Zapico: “El 25 de mayu ye una fecha que tien tolos ingredientes pa convertise nel Día d’Asturies”

El sábadu cumpliéronse 205 años de la proclamación de soberanía de la Xunta Xeneral pa declarar la guerra al exércitu francés. Esta fecha, el 25 de mayu, ye defendida pol historiador Faustino Zapico como l’afayadiza pa celebrar el Día d’Asturies.

“Axunta modernidá y tradición; conservación y subversión… Tien tolos ingredientes pa ser una fecha celebrada pola totalidá de la población asturiana”, sía cuál sía’l so signu políticu, frente al actual 8 de setiembre, “nel que la protagonista ye la ilesia católica”, afirma Zapico. Por esti motivu, el mierense, autor del llibru ‘1808 o l’aniciu de la historia contemporánea d’Asturies’, editáu  nel 2007, reivindica el 25 de mayu como fecha afayadiza pa la celebración del Día d’Asturies, postura que defende con un artículu mui completu nel so blogue, 'L'arcu de texu'.

Zapico llamenta l’escaezu institucional del 25 de mayu, salvando l’añu del bicentenariu, “al ser una fecha más redondina”, y ve importante conmemorar esta fecha poles connotaciones politiques que tien y pol fechu de facer país, viendo munchos paralelismos ente’l 1808 y 2013. Nesi sen, l’historiador recuerda cómo foi’l pueblu’l que llevó a la Xunta Xeneral a declarar la soberanía pa enfrentase a la tiranía napoleónica y que, anguaño, tamos nuna situación asemeyada, cola diferencia de que l’enemigu nun ye un exércitu, sinón les politiques económiques. Si d’aquella la resistencia énte Napoleón foi unánime, la celebración del 25 de mayu debería servir pa reivindicar una postura similar, dalgo que nin l’arcu políticu mayoritariu nin los sindicatos mayoritarios faen, na so opinión.

Un Día d’Asturies, con Asturies

Nel artículu del blogue, Zapico fai referencia al manifiestu en defensa del 25 de mayu robláu pola izquierda estatal, en concreto, pola Asociación Lazaro Cardenas, l’Atenéu Obreru de Xixón, Asturias Laica, Cultural Gijonesa, Izquierda Xunida de Xixón, Observatorio de la Memoria, U.J.C.E y Plataforma Comunista/ Red Roja, señalando que nun se pue celebrar “un Día d’Asturies, ensin Asturies”. Pese a nun ver mala intención na convocatoria, considera que nun se da “una ruptura colo anterior”, como señala’l manifiestu, pa lo que’l mierense básase na bibliografía espublizada nos 30 años últimos, sobre manera na “obra monumental” de Marta Friera o la d’Alicia Laspra. “Hubo un componente subversivu, pero apelaron a la llexitimidá del parllamentu del sieglu XII”, afirma l’historiador.

Entrugáu sobre los pasos que deberían de dase pa consolidar el 25 de mayu como una fecha que conmemorar, inclusive pasando la celebración del Día d’Asturies al quintu mes del añu, Zapico tien una respuesta nidia y rápida: “perseverar”. “Hai que socializar esi discursu pa que más sectores de la sociedá participen nél”, afirma, pa depués añadir que “discursu, hailu”.

Una fecha escaecida na escuela

Otru pasu importante p’afitar el 25 de mayu ye que la población conoza qué ye lo que pasó n’Asturies, dalgo que se complica dende la base, yá que nos institutos asturianos esta fecha escaezse. Por mor de la Llei Aguirre, qu’obliga a un temariu ampliu na materia d’Historia, los acontecimientos que se vivieron n’Asturies esi 1808 “pásense perriba o nun se toquen”, dependiendo del enfotu que tenga’l profesor. Una situación que se da inclusive pese a que’l Gobiernu d’Asturies pueda incluyir conteníos propios y que va dir a peor cola entrada de la Llei Orgánica pa la Meyora de la Calidá Educativa (LOMCE), según afirma Zapico, profesor en Secundaria.