Zapica, Corquiéu y La Tarrancha, actuaciones destacaes d’esta fin de selmana

L’oriente d’Asturies va vivir dos conciertos prestosos esti sábadu. Zapica va actuar en Porrúa y Corquiéu na so casa, Ribeseya. Mentes, La Tarrancha va xubise’l domingu al escenariu centra de la ‘Semana Negra’, que comienza’l vienres.
 
El conciertu de Zapica en Porrúa, entamáu pola Asociación Cultural Llacín, va principiar a les 23.30 hores y, como ye vezu, va disponer d’una pantalla onde’l públicu va poder ver les lletres de los cantares tradicionales y de chigre que componen el repertoriu d’esti grupu. L’oxetivu ye que la xente participe nel espectáculu. Mentes, una hora antes, nel centru Tito Bustillo, Corquiéu va ufrir una actuación a los sos paisanos dientro del ciclu ‘Viva las noches’ qu’avera la música del país a equipamientu culturales asturianos.
 
Pal domingu, la cita musical va tar na ‘Semana Negra’, en concreto nel escenariu central de certame dedicáu a la lliteratura policiaca, col conciertu de La Tarrancha. Ésti va principiar a les 22.30 hores y nél el grupu de ‘mecigayu-ska’ va facer baillar a toles persones presentes. Otres actuaciones onde les lletres n’asturianu van tener presencia van ser les de Xera, el martes, y la de Los Berrones, el miércoles. Completen el programa del escenariu central de la ‘Semana Negra’ Javi y los Paramétricos (vienres), Nixon (sábadu), Pauline en la playa (llunes), Capitán Cavernicola Blues Band (xueves), Black Horde y Lilita (vienres 29), y Stormy Mondays (sábadu 30).