Zapatero refuga establecer midíes d’axuste nueves pese a les recomendaciones del FMI

José Luis Rodríguez Zapatero, presidente del Gobiernu estatal, nun tien previsto establecer midíes d’axuste nueves pese a les recomendaciones del FMI. L’organizacion intergubernamental señaló’l martes que l’axuste fiscal nel Estáu “tien que siguir”.
 
“La respuesta de les autoridaes españoles foi fuerte y tán reconociéndola los mercaos financieros, como vemos nos diferenciales de los bonos”, apuntó en rueda prensa Paolo Mauro, responsable de la división fiscal del Fondu Monetariu Internacional (FMI), quien, sicasí, alertó de que “España nun ta fuera de peligru, polo que l'axuste fiscal tien que siguir” de manera especial nel ámbitu de les comunidaes autónomes. Zapatero, por contra, apuesta por avanzar nes reformes yá entamaes que contribuyeron a restaurar la  confianza de los mercaos nel Estáu, según señaló en declaraciones feches a RTVE tres un alcuentru con empresarios chinos en Beijing.
 
El presidente del Executivu considera que l’Estáu “fixo los deberes” y garantizó que la economía estatal va cumplir la previsión de déficit, pa lo que se comprometió a “nun baxar la guardia”, calteniendo la firmeza al respeuto de l'austeridá y rematando les reformes en cursu. Otra manera, Zapatero adelantó que’l Conseyu de Ministros del vienres va aprobar una “midida importante”, que podría ser un plan pa facer asoleyar la economía irregular.