Zapatero diz qu'España va tardar cinco años en reformase

El presidente español, José Luis Rodríguez Zapatero, aseguró qu'España va precisar cinco años pa correxir los desequilibrios estructurales de la economía, polo que queda per delantre un "llustru decisivu".

Mientres el so retruque na so comparecencia nel Congresu pa dar cuenta del últimu Conceyu européu, Zapatero aseguró que los activos colos que cuenta l’Estáu español pa encarar la nueva etapa "son méritos de toos", polo qu'apeló a la responsabilidá de los grupos nesti llabor. "Nun quiero ser descomanadamente solemne, pero sí seriu bastante", indicó.

Al so paecer, el llabor de correxir estos desequilibrios nun va ser namás d'un Gobiernu, sinón que se va tratar d'un trabayu colectivu qu'esixe adoptar una óptica que permite sumar esfuerzos y llegar a acuerdos. "Esa óptica se tien. Hai un poderosu filo conductor que mos une, que ye Europa", indicó, n'asegurando que'l camín pa percorrer ye'l de los "grandes acuerdos".

Reforma pensiones
Dientro d'estos desequilibrios, el xefe del Executivu destacó la necesidá de garantizar la estabilidá fiscal al llargu plazu con dellos mecanismos, como la reforma del sistema de pensiones, al traviés d'un debate que la Cámara tien d'encarar "col rigor y l'algame que la cuestión requier" pa llanzar un mensaxe de gran confianza hacia'l futuru.
  
"Algunos dicen que ye pa los mercaos, pero ye pa los españoles más mozos", señaló'l presidente, en recordando que si se quier un sistema de pensiones como'l d'Alemaña o Suecia, va haber que facer los mesmos esfuerzos que faen estos países, contando con que si'l llabor ye "común y compartíu" pue demostrase que'l país ye capaz d'algamar les metes que se propón.

En concreto, volvió defender la idea d'alzar la edá de xubilación a los 67 años con flexibilidá, de forma qu'España seya ún de los países que trabaya al llargu plazu y que sube la cuesta "progresivamente" y faciendo un esfuerzu razonable", pa nun tener que subir "una parede nel últimu momentu".
  
Otres reformes
De la mesma forma, destacó la necesidá de llevar a cabu otres reformes como la de la política enerxética o la d'unes instituciones llaborales que demostraron "demasiada rixidez" y que provocaron una alta temporalidá y axustes nel empléu en tiempos de crisis.
  
Zapatero almitió que fizo dellos recortes sociales, anque "bien llendaos y imprescindibles", anque recordó qu'España ye probablemente'l país que consolidó un estáu del bienestar "más fuerte en menos tiempu". 
  
Al so paecer, nel futuru hai qu'empezar una etapa de reformes, esfuerzos, productividá y pactos. "Esto ye, hai que tener una etapa de visión, algame, de responsabilidá y de capacidá de compromisu anque seya duru y anque seya impopular. Y en concencia nós tamos dispuestos a ello", indicó.