Zapatero avisa a ETA de que'l comunicáu "nun val"

|

El presidente del Gobiernu, José Luis Rodríguez Zapatero, alvirtió a ETA que'l comunicáu qu'emitió "nun val" y que'l Gobiernu nun va permitir "nengún engañu". Tamién avisó a Batasuna de que tien de separase d'ETA.

Nuna entrevista n'Antena 3, el xefe del Executivu quiso dexar claro que'l comunicáu de la organización armada "nun val". Nesti sen, aseguró que la banda "tien que dar pasos muncho más contundentes y definitivos" y precisó que'l Gobiernu nun va permitir nengún “engañu”.
  
Zapatero calcó en que'l comunicáu emitíu pola organización, nel que declara una tregua permanente, xeneral y verificable, ye "insuficiente". "Sólo esperamos un comunicáu de la disolución definitiva", afirmó, al tiempu qu'alvertía que'l camín va ser "bien llargu" porque "namás val" el fin definitivu d'ETA". "Nun va haber nenguna condición política qu'aceptemos, que puea valir pa los oxetivos d'ETA", avisó.

Nun habrá negociación y siguirán les detenciones
El presidente tamién quiso dexar claro que'l Gobiernu "nun va baxar la guardia", que "la política antiterrorista va caltenese, igual que la unidá de los demócrates" y que van caltenese les detenciones de quien "participen o formen parte d'ETA y cometieron delitos". "Por supuesto que van siguir les detenciones y vamos siguir la persecución d'aquellos que nun respeten les lleis", esclamó.
  
No referente a la negociación que plantega la organización nel comunicáu, Zapatero precisó que "nun va haber nengún tipu de diálogu, lo que tienen que facer saber yá". Nesti sen, precisó que los terroristes tendríen que llegar a la conclusión, tres la debilidá oxetiva a la que llegaron, que "nun tienen nada que facer". "L'únicu horizonte que tien ye abandonar les armes y respetar les lleis", calcó.
  
A la pregunta sobre si Batasuna va poder tar en mayu nes elecciones municipal y forales, el presidente esplicó que "la llei ye bien clara" y que Batasuna tien que saber que "o ETA abandona les armes o se separen y refuguen a ETA pa poder tener alguna posibilidá" d'acudir a unes elecciones comicios.

Los tribunales tendrán la última palabra
"Ye lo que diz la lletra y l'espíritu de la nuesa lexislación y lo que van aplicar los tribunales, que ye a quien n'última instancia correspuende dirimir sobre partíos, llegalidá y candidatures", argumentó.
  
Zapatero dixo nun sentise "frustráu" pol comunicáu d'ETA y espunxo que'l procesu pa col conflictu armáu "va ser duru, costosu y difícil". Sicasí, afirmó que se ta nel horizonte de ver esi fin de la violencia. Pero precisó que "va costamos tiempu" y reclamó unidá con "fortaleza, intelixencia y defendiendo los principios del Estáu democráticu".
 
Sicasí, nun quiso aventurar una fecha a preguntes sobre si'l fin d'ETA podría ser esta llexislatura. "Nun pue faese un pronósticu", alegó.
 

Contador Estadistiques