Zapatero anuncia un "plan d'acción" a 15 meses

El presidente del Gobiernu, José Luis Rodríguez Zapatero, anunció un "plan d'acción" del Gobiernu pa los próximos 15 meses que va aprobase esti vienres nel Conseyu de Ministros y que va incorporar toles midíes anunciaes pol Executivu.

Asina lo adelantó Zapatero nel plenu monográficu sobre l'empléu nel Congresu, onde esplicó que tamién s'aprobará la creación d'una Comisión Interministerial que, presidida pol vicepresidente primeru, Alfredo Pérez Rubalcaba, va promover el desarrollu de la Nueva Axenda Social y va asegurar la coordinación d'esfuerzos ente les alministraciones.
  
Esti Plan inclúi tolos compromisos del Gobiernu pa los próximos meses ente los que s'inclúi, por exemplu, el desarrollu de la reforma llaboral, que contempla cola definición del 'fondu austriacu' en primavera o la reforma del sistema de pensiones, que va llegar a les Cortes antes qu'acabe'l primer trimestre del 2010.
  
De la mesma forma, va incluyise la reforma de la negociación colectiva y de les polítiques actives d'empléu, coles mires d'elevar la empleabilidá y les posibilidaes d'inserción llaboral de los paraos, especialmente de los mozos y los paraos de llarga duración.
  
Privatización d’empreses públiques
El Plan d'acción va incluyir tamién el desarrollu del plan de racionalización del sector públicu empresarial, col que'l Gobiernu va estinguir 14 empreses y va fundir 24 antes qu'acabe l'añu, pasando asina de 106 empreses a 77. De la mesma manera, va incluyir un plan integral de política industrial que se va presentar antes qu'acabe'l 2010 pa promover un mayor desarrollu del sector.
  
El mentáu Plan pa los próximos 15 meses va incluyir tamién la Llei de Servicios Profesionales, que va presentase nel primer trimestre del 2011, según una nueva Llei reguladora de la xurisdicción social y la reforma de la Llei Concursal, que va aprobase'l próximu vienres nel Conseyu de Ministros.
  
Sector enerxéticu y simplificación de cargues alministratives
Coles mesmes, va incluyir la reforma del sector enerxéticu, que se va presentar con "calter inmediatu" si nun se llogra un acuerdu nes próximes selmanes; y delles midíes pa meyorar la competitividá, como la puesta en marcha en xineru d'una dotación de 1.000 millones pal Fondu de la Economía Sostenible o l'impulsu de los instrumentos d'inversión de capital riesgu n'empreses de base tecnolóxica con una dotación de 300 millones.
  
De la mesma forma, el Gobiernu va presentar antes qu'acabe l'añu un paquete d'eliminación y simplificación de cargues alministratives con un aforru d'unos 2.000 millones y va xeneralizar hasta'l 2015 la llibertá d'amortización. Tamién se desimirá de tributación les ampliaciones de capital nel Impuestu sobre Tresmisiones Patrimoniales y Actos Xurídicos Documentaos a toles sociedaes.
  
Nueva Axenda Social
Per otru llau, el Gobiernu va incluyir nel Plan la Nueva Axenda Social, qu'inclúi la reforma de la formación profesional al traviés d'un real decretu que se va presentar nel segundu semestre del 2011 y l'anteproyectu de Llei d'Igualdá de tratu, que se va aprobar primero qu'acabe'l 2010. Nesti sen, van incorporar criterios de preferencia en determinaos contratos públicu pa empreses que cumplan la presencia de muyeres n'estratos directivos.
  
En materia de conciliación, l'Executivu va aprobar la tresposición de la Directiva de la UE en materia de permisu parental, va aumentar les places d'escolarización de 0 a 3 años y va estudiar una regulación efectiva del teletrabayu.
  
A lo último, el Gobiernu va incluyir nel Plan pa los próximos 15 meses el desarrolllu de la Llei d'Economía Social, que define un marcu llegal pa la economía social y establez el compromisu de fomentala per parte de los poderes públicos. Nesti sen, l'Executivu va favorecer l'accesu a la financiación d'estes empreses al traviés del Fondu d'Economía Sostenible.