"Ye'l reflexu d'una sociedá que ve con arguyu y normalidá la so llingua", apunten los promotores de la moción

'Música n'asturianu sí' va facer un siguimientu de la programación pa que se cumplan los trés puntos incluyíos na propuesta aprobada en Plenu por tolos grupos sacante VOX.

"Alegrámonos de que la proyección artística y la promoción del asturianu seya una puntu d'alcuentru y consensu de la gran mayoría de la corporación municipal. Esto ye’l reflexu d’un sociedá xixonesa y asturiana que ve con arguyu y normalidá la so llingua asturiana, frente aquellos qu’inventaron un conflictu y quieren dividir a la sociedá creando problemes onde nun los había", valoraron los promotores de la moción, qu'añaden que "supón tamién que’l Plenu del Ayuntamientu desautoriza les intenciones manifestaes n’entrevistes, mítines y declaraciones a medios polos nuevos responsables de festexos de VOX", creando un efectu contrariu a lo qu’ellos queríen, porque’l testu aprobáu implica un compromisu en programar en Xixón más actividaes de cultura n'asturianu".

"Too esto pon de manifiestu que yá nun se pue faltar el respetu a la cultura y llingua asturiana ensin qu'haiga una respuesta y que yá valió de qu'a los asturianos y asturianes nos intenten facer de menos", rescamplen. Dende esti momentu, "vamos ver de qué manera se sustancia'l testu d'esta moción, y fadremos siguimientu de la programación de festexos de la ciudá na que nun puede tener sitiu la censura, nin los complexos nin los prexuicios llingüísticos".

Por último, dan "les más fonderes gracies a los cionco grupos municipales qu’aprobaron la moción" y piden a l'alcaldesa "que garantice y demuestre qu'esto va ser asina". Recuerden tamién que "la intervención nel Plenu pudo facese gracies a la implicación nel procesu de l’Asociación Grana, N’Alcordanza de Yolanda Huergo, una de les entidaes qu’apoyó esta iniciativa xunto a la Caxa Músicxs, la Sociedad Cultural Gijonesa, l’Atenéu Obreru de Xixón, y la Sociedad Cultural Gesto".

Na semeya, la música Mapi Quintana prepárase pa defender nel Plenu la propuesta presentada por Podemos, PSOE y Convocatoria por Xixón.