“Ye’l momentu de dexar pasar al frente a xente con idees nueves en Podemos”, apunta Xuacu Rodríguez

Jara Cosculluela queda en solitariu al frente de la secretaría d’Organización de Podemos tres la dimisión de Xuacu Rodríguez Morón. “Creo que ye’l momentu d’echame a un llau y dexar pasar al frente a xente con idees nueves”, aseguró’l madrilanu de nacencia, que va siguir nos órganos de direición del partíu.

“En Podemos tenemos nidio que nun somos profesionales de la política. Nosotros venimos equí a desempeñar una función y pasáu un tiempu determináu tornamos a les nueses carreres llaborales”, apuntó pa depués destacar que “entiendo que paeza raro que xente con responsabilidaes polítiques nos faigamos a un llau y tornemos a les nueses vides. Adrián Barbón lleva venti años viviendo de la política, María Luisa Carcedo casi 40, y nun ye lo habitual” tres ser entrugáu poles dimisiones que ta habiendo en Podemos, destacando la d’Emilio Léon como voceru del grupu na Xunta Xeneral.

“Ilusionáu” por tornar a la so carrera profesional, Rodríguez Morón dixo tar “arguyosu del trabayu que fiximos nestos cuatro años y de construyir de la nada un proyeutu que ta plantando cara al réxime de Javier Fernández y que gobierna nos conceyos d’Uviéu, Llangréu o Llanera”. Sobre un posible participación en dalguna llista pa les primaries de Podemos de cara a la configuración de la candidatura  a les eleiciones nacionales de mayu nun quixo confirmar nin desmentir nada y señaló que “ye pronto entovía”.