“Ye un bon momentu pa que’l Gobiernu promocione fuera la lliteratura n'asturianu”, apunta Antón García

Estos díes ta celebrándose en Barcelona la feria profesional Liber con presencia de nueve editoriales asturianes, dalgunes con obres n’asturianu, como Saltadera o Trabe. Antón García demanda una campaña del Gobiernu pa dar a conocer la nuesa lliteratura nel esterior al haber “obra suficiente pa esportar”.

“Ye un bon momentu pa que’l Gobiernu promocione fuera la lliteratura n’asturianu, con obra suficiente pa esportar”, apunta’l responsable de Saltadera, que señala que la so esperiencia na Feria Internacional del Llibru, Industria Editorial y Editores de Llibros (Liber) “nun ye mui bona” cola so producción en llingua asturiana. Sicasí, “llevamos los llibros qu’editamos n’español y les novedaes n’asturianu”, siendo les traducciones les que más llamen l’atención entres distribuidores, otres editoriales y llibreros.

“No que respueta a los obres n’asturianu, más que la merca de derechos, esta feria permítennos contautar con otres editoriales n’otres llingües”, espresa Esther Prieto, d’Ediciones Trabe, que llevó a Barcelona una decena de títulos en llingua asturiana. “Liber ye un puntu d’alcuentru de tolos sectores que tienen que ver col llibru”, esplica García, que considera más afayadizos otros escenarios pa una promoción de la lliteratura n’asturianu “que debería recayer na Alministración”.

Asina, rellata la intención d’una editorial británica que pretende facer una antoloxía de poesía fecha en llingua asturiana, proyeutu pal que tien dificultaes polos costos que lleva de derechos y traducciones. “Les ayudes del Gobiernu nun recueyen esti tipu de proyeutos que daríen una visibilidá a la nuesa lliteratura mui importante”, apunta’l responsable de Saltadera, que recuerda tamién les campañes publicitaries entamaes poles alministraciones gallega, catalana o vasca pa dar a conocer la so producción lliteraria nes llingües propies y que considera que l’asturiana debería imitar.

Más de 350 espositores

Liber acueye a más de 350 espositores de más de diez países y tien más de 10.000 visitantes, con 450 profesionales de 70 estaos como convidaos, tando esta edición dedicada a Cuba. Asturies participa con un puestu propiu nel que Saltadera, Ediciones Trabe, Pintar-Pintar, Ediciones Trea, Hoja de Lata, Uve Books, Satori Ediciones, Pez de Plata, y Rema y Vive tienen representación.

Na semeya, un cachu del puestu d'Asturies en Liber.