“Ye un arguyu venceyar el mio nome al d’Andrés Solar”, afirma Candás

‘Aire mugoriento’ ye’l títulu ganador del III Premiu de Novela Curtia Andrés Solar Santurio qu’entrega’l Conceyu de Xixón, una obra de “tremendismu sicolóxicu”, según definió’l so autor, Ricardo Candás. El xixonés afirmó que “ye un arguyu venceyar el mio nome” al del de Deva.

Candás ye’l tercer escritor en llevar esti gallardón, dotáu con 3.000 euros y la espublización de la novela, depués de Milio Rodríguez Cueto y Gonzalo G. Barreñada. El xuráu aconceyó’l 21 de payares, anque nun foi hasta esta mañana cuando se fixo público nun eventu nel salón d’actos del Antiguu Institutu nel que tuvo presente un añu más Lali Solar, hermana d’Andrés, xunto col so home, Jesús.

Encargóse de conducilu la conceyala de Cultura, Mocedá y Museos, Ana Montserrat López Moro, qu’entamó felicitando a Candás “por esta novela que recomiendo lleer porque ye mui entretenida”. “Como ye persabío, la llingua asturiana foi quien a crear una tradición lliteraria propia y autónoma que vien perviviendo polo menos dende’l sieglu XVII, con unes formes, modelos y discursos que ye conveniente conocer y gociar, porque son una manifestación del llabor artísticu del nuesu pueblu. La creación lliteria supón dedicar un tiempu y un esfuerzu que son susceptible de ser reconocíos per parte de los poderes públicos”, espresó la edil de Foro.

Por esti motivu, el so departamentu, “nel so enfotu de favorecer y promover la creación lliteraria n’asturianu y al tiempu facer alcordanza de la figura del escritor xixonés Andrés Solar Santurio y la so querencia pola llingua de nueso y la so normalización, convocó’l Premiu de Novela Curtia Andrés Solar Santurio”, autor del que fixo un breve resume de la so trayeutoria nel cabudañu de la so perda nel 1984 a los 29 años por un accidente de tráficu. Mentes, sobre Candás, profesor de Filosofía en Cantabria, apuntó que "tien publicaos cinco poemarios n’asturianu, cuatro d’ellos gallardonaos colos más renomaos premios de poesía como son ‘Quiciás seya payares’, ‘Naufraxos’, ‘Nos díes pensatibles’, ‘Superficie del silenciu’ o ‘Tantu escaezu’. Tamién tien publicao un volume de narrativa ‘Les últimes pallabres’".

Por unanimidá

María Xosé Rodríguez López, responsable de la Oficina de Normalización Llingüística y miembru del xuráu, onde tamién fixo’l llabor de secrataria, lleó l’acta darréu. “De resultes del aconceyamientu y tres analizar con procuru les trece obres presentaes, el xuráu decidió por unanimidá conceder el premiu a la novela ‘Aire mugoriento’ presentada col nomatu ‘Juger’, que n’abriendo la plica resultó ser Ricardo Candás”, treslladó a los presentes.

Sobre la obra’l xuráu, presidíu por López Moro y formáu tamién por Xandru Martino, filólogu, escritor y académicu de la llingua asturiana; Luis Casteleiro, filólogu de la Direición Xeneral d’Aición Cultural y Normalización Llingüística y escritor; y Montserrat Machicado, filóloga especialista en llingua asturiana y responsable de la Estaya de la Llingua d'Avilés, rescampló “la fondura y bona realización de la historia que narra la novela, con unos personaxes mui bien construyíos y definíos psicolóxicamente, y na que se reflexen esperiencies personales con unes descripciones impactantes y crudes y una resolución formal bien bona, con un usu del llinguaxe mui procurosu, lo que fai, en conxuntu, una obra mui interesante”. Tamién emponderó “la calidá de les obres presentaes y la importante participación, lo que dio llugar a un intensu y estensu debate”.

Lali procedió depués a dar al ganador el detalle carauterísticu d’esti premiu: un retratu del so hermanu col testu del conocíu poema 'Asturies' del de Deva. Dio-y a Candás la norabona y animólu a siguir escribiendo porque “la llingua asturiana hai que promovela; él lluchó muncho por ella”.

Misteriu, thriller y novela negra

L’autor de ‘Aire mugoriento’ agradeció al xuráu y al Conceyu de Xixón “doblemente” por convocar el premiu y “por dame la posibilidá de venceyar el mio nome al nome d’Andrés Solar, una persona que los qu’escribimos y tamos dando-y fuelgu y puxu a les lletres asturianes conocemos pol valoratible llabor que fixo na so vida. Ye un arguyu tar venceyáu a esti nome”.

Tamién tuvo pallabres especiales pa Elizabeth Felgueroso “porque la mio obra si tien coses bonables ye gracies a les sos aportaciones, les sos visiones, les sos crítiques, y de xuru que’l xuráu valoró munches d’eses aportaciones tan certeres porque ye una crítica escelente”. Y, sobre manera, pal “mio fíu Mael, porque la novela llámase ‘Aire mugoriento’ porque cuando la lleáis dareisvos cuenta de que fala d’una atmósfera mui mugorienta, mui sucia, y cuando yes una persona qu’escribe muncho por impulsos, cuando tas dos hores escribiendo de coses tremebundes como ye la obra, Mael ye aire fresco, tolo contrario; ye aire vivo, aire gayaspero. Dame de nuevo toes eses fuerces pa salir p’alantre”.

Sonbre l’argumentu de la novela, que va asoleyase nos meses próximos, adelantó que “intenté facer tremendismu sicolóxicu, si esiste esi términu. Ye llevar los límites del sufrimientu humanu sicolóxicu a unes circunstancies mui peculiares”. “Trata d’un rapaz que por circunstancies familiares descubre que’l so padrastru fai una serie de crímenes y en tola novela él intenta da-y xacíu a esa tropelía del so padrastru y intenta resolver de dalguna manera dalgo que quedó irresolutu, esi crime, y ye un obsesión qu’en tola novela tien. Por eso ‘Aire mugoriento’, ye una obsesión que lu afuega, nun lu dexa dormir”, siguió sobre pa especificar depués que “ye un poco de misteriu, de thriller tamién, un poco novela negra”.

Por últimó, allegróse de que “el xuráu remarcara que faigo bien la descripción sicolóxica de los personaxes porque ye dalgo que m’interesaba muncho, el malestar psicolóxicu, mental, sobre too del personaxe principal. Él intenta resolver el crime como una manera de redimise y d’atopar de nuevo un amor filial que tenía un poco escaecíu”.