Ye too propaganda

La crítica especializao concueya en que les películes que faen en Hollywood tienen menos miga qu'enantes y en que los sos argumentos repítense d'una película a otra con un desarrollu cada vegada más probetayu, pero ye que pa encima, les cintes que se pasen nos cines, amás de males, tan convirtiéndose n'anuncios dientro de campañes publicitaries de dellos productos, sobremanera coches. A diferiencia de les series de televisión, onde los productos que paguen la serie salen nos decoraos, equí trátase de que la promoción protagonice la película, teniendo planos y secuencies enteres pa ella sola.

El casu más de recién ye'l de Men in Black II. La película, amás de Will Smith y Tommy Lee-Jones protagonízala tamién un coche de la casa Mercedes, que dicen que pagó 50 millones de dólares por apaecer na película. Ello ye que la fábrica de coches tien puestu hasta un xuegu de la película nel qu'hai qu'evitar que los estraterrestres roben la tecnoloxía de la casa alemana. La cosa nun ye nueva, porque la némesis de la Mercedes, BMW tamién pagó por salir na última de 007, y como nun ye nuevo, los gurús de la nueva economía ya-y tienen puestu nome a esta práctica, que llamen posicionamientu de productu Si quies dir al cine, pues mirar los horarios na cartelera d'Asturies.com