“Ye responsabilidá de la FSA alcontrar na Xunta Xeneral los apoyos necesarios p’aprobar la reforma”, insiste Palacios

|
Rafael Palacios rueda de prensa 21-F

El voceru de Podemos, Rafael Palacios, lleó esti 21-F una declaración con motivu del Día Internacional de la Llingua Materna na que criticó la Política Llingüística desdendolcada pol Gobiernu y la postura amosada pol presidente Adrián Barbón al dar por muertes les negociaciones. “Correspuende-y al Conseyu de Gobiernu presentar el proyeutu de Llei de reforma del Estatutu”, asegura.

“40 años de reclamación, 40 años d’Estatatu, y siguimos ensin ver reconocíos los nuestros derechos”, principió Palacios, “una anomalía democrática” dientro del Estáu. “N’Asturies les nueses llingües propies siguen ensin tener reconocimientu, y son años de maltratu, un maltratu que tien qu’acabar yá y que tien qu’acabar nesta llexislatura porque hai ferramientes pa que termine esti maltratu”, desendolcó avanzada la declaración.

“Esta Xunta Xeneral, que ye espresión de la soberanía popular, ye onde tien que debatise esa reforma estaturia y ye responsabilidá esclusiva del Gobiernu d’Asturies presentar énte esta Xunta Xeneral un proyeutu de reforma estatutaria pa que tolos grupos parllamentarios se pronuncien y posicionen con claridá”, aseguró darréu, una demanda na que Podemos vien insistiendo nes selmanes últimes. “Correspuende-y al Conseyu de Gobiernu presentar el proyeutu de Llei de reforma del Estatutu y ye responsabilidá de la FSA alcontrar na Xunta Xeneral los apoyos necesarios p’aprobar la reforma”, afirmó al tiempu que criticó a Barbón por “dedicase a dicir si ta vivo o non, si terminó o non, pero nun fixo absolutamente nada. Recayó too nos grupos políticos que menos diputaos y diputaes tenemos”, polo qu’esixó al presidente “voluntá política”.

D’igual forma, Palacios calcó en que “güei, queremos dicilo con claridá, el futuru de les llingües propies d’Asturies ta en peligru. Hai un proyeutu en marcha encabezáu pola derecha y la derecha estrema n’Asturies pa terminar pa siempre coles llingües propies d’Asturies”, faciendo referencia a “los señalamientos y ataques personales y coleutivos que tamos sufriendo les persones y organizaciones que defendemos la oficialidá”, lo que califica de “intolerable”. “Ye un ataque organizáu contra Asturies”, enfatizó.

Medios, profesoráu y situación de los SNL

La declaración entamóla’l de Ciañu repasando “el nulu desarrollu de la política llingüística n’Asturies, que nestos más de dos años y mediu de llexislatura nun tien nengún avance y, ye más, podíemos dicir qu’en dalgunos aspeutos hai un retrocesu claru”. “Les llingües d’Asturies siguen ensin tener presencia nos medios de comunicación públicos”, afirmó, culpando d’esta situación esclusivamente al Gobiernu, “que nunca punxo los medios afayadizos nin los fondos necesarios, nin la voluntá política indisepensable, pa desenvolver y pa promocionar les llingües propies d’Asturies” nunos medios “que s’entendieron pa vertebrar Asturies, pa desarrollar Asturies y pa facer pública y popular la cultura asturiana”.

Asina, recordó que na TPA namái hai una presencia testimonial del asturianu “con programes qu’apaecen y desapaecen, como los dedicaos al ámbitu infantil” y los que se programen en feches determinaes como la Selmana de les Lletres; “que va más de cinco años que nun se doblen películes, dalgo que siempre dio bonos resultaos d’audiencia”; y que dexaron d’emitise partíos de fútbol. “Y na RPA ye una llaceria”, añadió.

Palacios tamién se refirió a la situación del profesoráu de Llingua Asturiana, “penosa y de discriminación, con contratos a media xornada”, y al estáu de los Servicios de Normalización Llingüística, que “malpenes sobreviven con perres municipales y al compromisu, sacrificiu y voluntarismu de los profesionales que trabayen nellos”.

Na imaxe, Palacios esta mañana. Semeya obra d'Iván G. Fernández.

Contador Estadistiques