"Ye mui pronto pa falar d'avances en política llingüística", afirma Piñán na FIDMA

|
Berta Piñán, María Luz Pontón, Iván Llera y Inaciu Galán nel puestu d'Iniciativa pol Asturianu na FIDMA

La conseyera de Cultura, Política Llingüística y Turismu visitó los puestos de la Universidá d'Uviéu y d'Iniciativa pol Asturianu.

Berta Piñán tornó esta mañana a la Feria Internacional de Muestras d'Asturies (FIDMA), recintu que yá visitara en díes anteriores en compañía del presidente Adrián Barbón y más autoridaes. Nesta ocasión fíxolo sola col oxetivu d'acudir a los puestos de la institución universitaria, onde foi recibida pol rector Santiago García Granda, y del Banco Sabadell Herrero pa percorrer la esposición 'Asturias, tradición minera', anque finalmente tamién s'averó al pabellón 3 pa falar colos responsables de l'asociación que trabaya pola normalización del idioma y conocer l'actividá de les catorce empreses qu'amuesen los sos productos y servicios nesi espaciu al rodiu l'asturianu.

Entrugada pola prensa sobre avances na política llingüística, aseguró que "ye mui pronto pa falar d'ello. Güei cumplimos dos selmanes dende l'aterrizaxe y lo primero ye formar los equipos y qu'esos equipos comiencen a funcionar cáun nel so sector". Al respeuto, recordó que la so conseyería "ye complexa, porque tien como munches pates; munchos pegollos".

Na semeya Piñán; la secretaria d’Educación, Universidaes y Normalización Llingüística de la FSA, María Luz Pontón; el presidente d'Iniciativa pol Asturianu, Iván Llera; y el so antecesor nel cargu, Inaciu Galán.

Contador Estadistiques