“Ye increíble y nun tien sentíu”, apunta Palacios sobre la non reconocencia del B2 pola propia Conseyería d’Educación

Podemos rexistró una entruga per escrito a la conseyera Berta Piñán, responsable de la Política Llingüística, sobre la situación denunciada por SUATEA pol refugu de la Conseyería d’Educación de la inclusión del títulu B2 d’asturianu nel rexistru personal de formación permanente de los docentes. “Ye increíble y nun tien sentíu”, afirma Rafael Palacios.

El diputáu recuerda que ye la propia Conseyería d’Educación “la que convoca, ellabora, alministra evalúa y certifica unes pruebes de competencia llingüística adaptaes a la normativa europea y la que, depués, a les persones que les superen nun les valora en condiciones d’igualdá con otres llingües de Marco Européu”. “Hai que denunciar y denunciamos con total claridá que ye un engañu a les maestres y los maestros porque se creen títulos que llueu nun tienen la cobertura reglamentaria que garantiza la valoración y reconocimientu pa cuestiones tan importantes como son méritos pa oposiciones, concursu de treslláu o complementos salariales de profesión permanente”.

“Ye mui difícil d’entender”, sigue, “que la propia Conseyería d’Eduación nun reconoza les propies certificaciones y los propios títulos” argumentando que “nun cuenten cola documentación requerida pola normativa vixente, quier dicise, un títulu oficial de les escueles oficiales d’idiomes”. “Esto lo que demuestra a les clares ye’l despreciu históricu permanente, la falta de respetu y el maltratu institucional de l’Alministración a les llingües propies d’Asturies”, amás de la vulneración “de los derechos llingüísticos recoyíos na llexislación asturiana, española y europea”.

Dada la situación, la formación morada rexistró una entruga per escritu a Piñán “na que pidimos a la conseyería que ye responsable de la Política Llingüística n’Asturies que nos diga qué xestiones ta faciendo pa garantizar la cobertura normativa afayadiza pa que tolos títulos de Llingua Asturiana que da la Conseyería d’Educación y la Universidá d’Uviéu sían valoraos en condiciones d’igualdá colos d’otres llingües”. Por último, esixe al Gobiernu la creación “ensin más retrasu” de la especialidá docente de Llingua Asturiana y Gallego-asturiano y que garantice l’enseñu de dambes llingües “en tolos niveles educativos, incluyendo tamién les escueles oficiales d’idiomes”.

Na imaxe, Palacios nuna intervención na Xunta Xeneral. Semeya de Podemos.