“Ye importante pa los críos conocer el cancioneru asturianu”, asegura Fonseca

|
“Ye importante pa los críos conocer el cancioneru asturianu”, asegura Fonseca

Más de mediu millar d’escolinos y escolines de 17 centros escolares de Xixón participaron na quinta edición de Cantar Presta Muncho, que la selmana qu’entra celebra los sos conciertos. El so coordinador, Nacho Fonseca, destaca la importancia d’averar el cancioneru asturianu a la reciella.

Nacíu nel 2012 por iniciativa del entós conceyal de Cultura, Carlos Rubiera, Cantar Presta Muncho tien l’envís de llevar la música coral a los neños y neñes del Primaria d’una manera cenciella, activa y participativa. Dende un primer momentu, Fonseca foi l’encargáu de coordinar el so funcionamientu xunto colos maestros voluntarios responsables de los ensayos, xeneralmente de Llingua Asturiana o Música.

“Na primer edición participaron 7 centros y nesta yá llegamos a les 17”, apunta’l creador de Seliquiín y Xentiquina. Inclusive “en dalgunes escueles tuvimos que poner tope a les places de participantes, por temes d’espaciu, porque superaben los 60”, esplica, anque la media “per coru suel tar nos 30 componentes”.

Dende setiembre, los maestros y maestres comiencen a ensayar colos escolinos los cuatro cantares qu’escueyen ente los 100 propuestes pola organización. “Han de trabayar con dos de música tradicional y otres dos ‘actuales’, de Seliquín o Xentiquina”, apunta Fonseca, qu’acude mínimu dos vegaes pel añu p’ayudar a los coros no que sía necesariu. Pa ello reciben una versión del tema y otra en ‘playback’.

El llistáu de 50 cantares tradicionales básase principalmente nel del Torner, adaptáu pa los neños y neñes. “Ye importante pa los críos conocer el cancioneru asturianu”, afirma Fonseca, que recuerda que sirven al empar p’averar a la reciella a la llingua asturiana, “que ye la qu’utilicen estos cantares”.

Cantera pa la tradición coral de Xixón

Na presentación de los conciertos del V Cantar Presta Muncho tuvieron tamién presentes la conceyala d’Educación y Cultura, Ana Montserrat López Moro, y María Xosé Rodríguez López, responsable de la Oficina de Normalización Llingüística, qu’entama l’actividá. López Moro señaló’l so deséu de que Cantar Presta Muncho “sía una especia de cantera pa la tradición coral de la ciudá”, mentes que Rodríguez López recordó “la importancia del trabayu de les maestres y maestros”, cola ayuda “de la coordinación de Fonseca”.

Nesi sen, el sierense destacó cómo los maestros dediquen el so tiempu de descansu a los ensayos y llanzó’l so deséu de que “al menos 50 de los 500, esto ye’l 10 por cientu, sigan cantando depués de pasar por esta actividá”.

Pumarín-Xixón Sur y Teatru Xovellanos

Cantar Presta Muncho zarra la so actividá colos nomaos conciertos de primavera y col macroconciertu final del Teatru Xovellanos na que particien, en dos sesiones, los 641 participantes d’esta edición. Los primeros van tener llugar la selmana próxima nel Centru Municipal Integráu Pumarín-Xixón Sur, a les 10.30 hores con entrada llibre pal públicu, mentes que pal domingu nel Xovellanos ye necesario invitación –danse dos por cantante–.

Ésti ye’l programa de los conciertos de Cantar Presta Muncho:

  • Llunes: El Llano, Asturias, Rey Pelayo y Sanatorio Marítimo.
  • Martes: Jovellanos, Elisburu, Montiana y Castiello
  • Miércoles: Severo Ochoa, Montevil, Milagrosa y Federico García Lorca.
  • Xueves: Manuel Martínez Blanco, Clarín, Noega y Príncipe de Asturias.
  • Domingu (12 hores, Xovellanos): Montevil, Sanatorio Marítimo, Noega, Federico García Lorca, El Llano, La Milagrosa, Príncipe de Asturias, Coru de Profes, Rey Pelayo.
  • Domingu (18 hores, Xovellanos): Jovellanos, Severo Ochoa, Elisburu, Montiana, Asturias, Manuel Martínez Blanco, Clarín, Coru de Profes y Castiello.

Na semeya, Rodríguez López, López Moro y Fonseca.

Contador Estadistiques