Yá ta na cai'l nuevu discu de Corquiéu

Salia ye'l nome col que se presenta'l segundu discu de los asturianos Corquiéu. Dempués d'una llarga espera, los de Ribesella afonden más no que s'albidraba d'ellos nel so primer discu.

Yá ta a la venta l'esperáu segundu discu de Corquiéu, Salia, qu'asoleya y distribuye'l sellu Tierra Discos. Salia caltién les virtúes que Corquiéu yá espeyó nel so primer discu, La Barquera. que salió espublizáu ya va pa cuatro años. Agora, el grupu afonda nes dos llinies estilístiques qu'amosó nesi discu, per un llau'l gustu por un folk contundente, rápido y que bebe ensin dubia de les fontes de grupos de corte irlandés y escocés. Esa podemos considerala una de les marques de la casa del grupu, la otra, l'apueste polos temes cantaos cola voz de la so vocalista Gema García. D'esta manera topamos siete temes cantaos nel discu con lletres del poeta Xandru Martín na que l'estilu averáu a les voces tradicionales irlandeses de Gema mecese, en dalgún momentu, con toques pop na so voz y nes igües.


La ufierta del repertoriu instrumental de la formación, reforzada por ún de los
flautistes mozos más prometedores d'Asturies, el navetu Xurde Fernández, nun se sal de la llinia marcada nel anterior trabayu, amiestos de temes al más puru estilu Corquiéu, xunta pieces melódiques de calter más sele y igües cuidaes qu'equilibren el discu.


Con too y con ello, nótase la mano na producción musical d'Ígor Medio, bouzouky de Felpeyu, y la gran aportación técnica nel soníu del escocés Grant Milne. Amás nel cd tamién collaboraron músicos como'l baxista Horacio A. García y Ramón G. Morán a los teclaos. Pa conocer meyor nada como sentilos mercando'l so discu, cosa que yá se puede facer na nuestra tienda n'internet Asturshop.