...y Javier Fernández respuende-y que "el so oxetivu ye confundir"

Javier Fernández, na so segunda intervención, criticó l'usu políticu que facía Mercedes Fernández de la llingua asturiana. Tamién recordó que foi'l PP el que defendió la posibilidá d'una oficialidá diferida na reforma última del Estatutu d'Autonomía.

Darréu, facemos una esbilla de les frases más destacaes del presidente del país, que fixo referencia a delles declaraciones recoyíes pola prensa, inclusive una de la propia Mercedes Fernández del añu 1998:

• "El so oxetivu ye confundir".
• "Naquel momentu —en referencia a la reforma del Estatutu— entrugámonos qué facemos y qué futuru queríamos pa l'asturianu. Recoyimos eso naquella llei, que s'aprobó por unanimidá, y que falaba de proteición y usu".
• "El 10 de mayu del 2000 tolos periódicos espublizaron un manifiestu que firmaben persones como Pedro de Silva, el rector Julio Rodríguez, escritores en castellanu como Fulgencio Argüelles o Ángeles Caso, y n'asturianu como Xuan Bello o Vicente García Oliva, amás d'artistes, músicos o deportistes. Pidíen que nun hubiera una utilización política de la llingua, xustamente lo contrario de lo que vusté vien a facer equí".
• "Los que defendieron una oficialidá en diferío foron vustedes".
• "Pa descalificar val cualquier idioma, l'asturianu tamién".