Yá se conocen los nominaos a los premios AMAS 2011

Ochenta artistes asturianos tán nominaos a los VI Premios Anuariu de la Música n'Asturies (AMAS). En total, van ser 20 categoríes, diez a tola trayectoria profesional y otros diez al trabayu realizáu mientres 2010.

Según esplicó en rueda de prensa Chalsetto, subdireutor de los premios Amas, yá pueden votase a los candidatos a partir de güei, hasta'l próximu 17 de febreru, na páxina web de los Amas. Nesti sentíu, manifestó que l'oxetivu ye "superar los 38.925 votos que tuvo na pasada edición".
     
Los premios concedíos al trabayu realizáu mientres 2010 son los siguientes: portada y diseñu; vídeoclip; canción folk; discu folk; cantar rock; discu rock; cantar otres escenes; discu otres escenes; grupo revelación; y banda sonora de curtiumetraxe asturianu.
  
Los galardones otorgaos a los músicos por tola so trayectoria profesional son: voz; baxu; batería; guitarra; teclaos; otros preseos; gaita; lletres; producción; y, a lo último, directu.

Bandes como Corquiéu, La Col.lá Propinde, Skontra, Skama la Rede o artistes como Anabel Santiago y Héctor Braga, tán nominaos nestos premios que van entregase’l próximu 4 de marzu nel Teatru Filarmónica d'Uviéu.
 
Per otra parte, el subdireutor de les Amas dixo qu'espera que se publique l'Anuariu de la Música en Asturias (AMAS) a partir del próximu mes, una publicación que recueye'l panorama de la escena musical de la rexón a lo llargo de 2010, con entrevistes y reportaxes.
 
Retresmisión de la TPA  
La Televisión del Principáu d'Asturies (TPA) va retresmitir la gala d'entrega de los premios. El director de Retresmisiones y Relaciones Corporatives de TPA, Antonio Virgili Rodríguez, apuntó que la emisión de la ceremonia ye un sofitu a el ceadores musicales" del Principáu.