XXIV Fiesta de la Oficialidá de la Llingua Asturiana en Bimenes

Esti añu'l día de la Fiesta de la Oficialidá, el 4 de xunetu, contará con solo dos actividaes.

Énte la problemática surdía pol espardimientu del COVID-19, y les midides que se tán tomando pa torgar el so avance, el Conceyu Bimenes va entamar la XXIV Fiesta de la Oficialidá de la Llingua Asturiana na fecha prevista del sábadu 4 de xunetu pero con un programa adaptáu a les circunstancies.

Esti añu la Fiesta de la Oficialidá contará con solo dos actividaes. Pela mañana, a les 12 hores na Casa Conceyu de Martimporra, sedrá l'actu institucional onde l’Alcalde de Bimenes, Aitor García Corte, fadrá una declaración formal favoratible a la oficialidá del asturianu. Esti actu tará peslláu al público pero que se va retresmitir en direuto al traviés de la páxina de facebook municipal, completaráse con un saludu d’Artur Nunes, Presidente de la Cámara Municipal de Miranda de l Douro, y cola actuación musical d’una pareya de gaita y tambor.

La segunda activdá d'esti día va ser una representación teatral a les 20:00 hores na Casa Cultura de Santuyano a cargu del Grupu de Teatru de l’Asociación Cultural Maura Xeva, que va poner n’escena la obra 'Muyeres na mina'. Esta última actividá ta acutada pa 50 persones, y les que quieran asistir tienen de pasar pela Casa Conceyu nos díes previos pa recoyer una entrada, que s’apurrirá de baldre, y acudir esi día con mázcara.

D’otra miente, nunos díes van conocese tamién los ganadores del XXXIII Concursu de Cuentos pola Oficialidá del Asturianu.