Xuventú Asturianista pide que la selección asturiana vuelva a xugar

Xuventú Asturianista llamentó que la selección asturiana de fútbol lleve ensin xugar ocho años. D’esto mou critiquen que’l PSOE y IX tengan “abandonao too nos deportes que tengan un rispiu que ver cola identidá asturiana”.

Pa les mocedaes del PAS, ye la “inactividá” de los gobernantes asturianos la que “torga a los asturianos dende hai ocho años ver a la selección nacional nel deporte rei”. Los asturianistes esixeron la torna d’estos partíos que solíen xugase en feches del Nadal.

“Nun mos podemos imaxinar que fexo’l pueblu asturianu pa que otres comunidaes autónomes puedan tenela y nosotros non”, llamenta Xuventú Asturianista sobre l’ausencia deportiva. Amás criticaron a les “fuerces centraliegues españoles PSOE y IX” de que la so política deportiva “nun tien nenguna credibilidá”.

Los asturianistes sorrayaron que ver a xugadores como David Villa, Santi Cazorla o Juan Mata na mesma selección “sedría una folixa pal fútbol asturianu y pa los asturianos”. Amás, añadieron que’estos partíos “daríen perres pal desendolcu de polítiques deportives nun tiempu perdifícil pa munches asociaciones y peñes deportives”.

P’acabar pidieron la torna de la selección asturiana de fútbol, el so afitamientu como representante futbolísticu de los asturianos y la oficialidá y normalización internacional de toles federaciones deportives asturianes.

Partíos de la selección
Una iniciativa de la Fundación Nueva Asturies foi la que fexo les actividaes de sofitu pa la creación de la selección asturiana. Ente otres coses, una recoyida de formes de futbolistas asturianos de 1ª y 2ª División foi lo que posibilitó que la selección asturiana xugara nel añu 2000 contra Macedonia y nel 2002 contra Honduras.