Xuventú Asturianista critica l’usu del Conseyu d’Estudiantes de la Universidá por parte del PSOE

La reunión del Conseyu d’Estudiantes con dos conceyales del PSOE esti llunes pasáu pa falar sobre la ubicación de la ‘Semana Negra’ sigue llevantando crítiques. Xuventú Asturianista asegura qu’esti aconceyamientu foi “un engañu”.
 
N’opinión de les mocedaes del PAS, la reunión ente los conceyales d’Innovación y Festexos, José María Pérez y José Manuel Sariego, respeutivamente, y el presidente del Conseyu d’Estudiantes de la Universidá d'Uviéu, Rubén Menes, que tuvo acompañáu del so vicepresidente, Iván Allende, y del vicesecretariu de Relaciones Internacionales, Jesús Sanjurjo, foi “un engañu” que tenía como finalidá “llavar la cara al Ayuntamientu y d’esta manera tener un xustificante por parte del PSOE ya IU de que los estudiantes sofiten esi eventu nun espaciu académicu”. Nel aconceyamientu, los estudiantes llegaron a un alcuerdu pa nun poner torgues al certame nuna parcela municipal situada al lláu de la Escuela Superior de Marina Civil si se respeta’l calendariu académicu y se garantiza’l mantenimientu y seguridá de les instalaciones universitaries.
 
Xuventú Asturianista asegura tamién que los tres miembros del Conseyu d’Estudiantes “nun taben ehí pa defender los intereses” de los universitarios y que la reunión tuvo fines partidistas puesto que los representantes de los alumnos yeren “miembros d’esi partíu”, en referencia al PSOE. “La credibilidá y representatividá del Conseyu d’Estudiantes ye nula”, añade. El coleutivu asturianista tamién quier recordar el so refugu a “la instalación durante 10 díes d'un eventu festivu d'esti calibre nun espaciu universitariu” y “el nuesu sofitu a la Universidá d'Uviéu” na so oposición al festival na parcela pegada al campus de Xixón.
 
Estes crítiques de les mocedaes del PAS xúnense a les d'otres organizaciones, como'l Coleutivu d'Estudiantes conta la 'Semana Negra', y tamién a les de miembros del Conseyu d'Estudiantes, onde nun sentó bien l'actuación del so presidente. Nun comunicáu, persones contraries a la xestión de Menes aseguren que ésti nun consultó al órganu de decisión de los estudiantes y qu’actuó pola so cuenta.