Xuristes pol Asturianu estrena web oficial

L'Asociación "Aconceyamientu de Xuristes pol Asturianu" (AXA) qu'integren más de mediu centenar de xuristes interesaos na dfeensa del asturianu y losderechos de los sos falantes, presenten, dempués del primer añu y mediu de funcinamientu del colectivu, la so web oficial.

Dende Xuristes pol Asturianu cuiden qu'esta páxina "habrá valir pa facilitanos el llabor de siguir trabayando pola normalización xurídica de la realidá llingüística asturiana, al empar que mos permitirá atender de mou más eficaz les munches necesidaes y demandes que reclamen anguaño los ciudadanos falantes d'asturianu".

Ello ye que los interesaos van poder contactar cola asociación al traviés de la web pa llograr información o orientación en casu de necesidá d'amparu llegal.

Amás de recoyer la información concerniente a la propia asociación, inxertando los sos estatuto o grupos de trabayu, la web cuenta con un estoyu de noticies rellacionaes cola realidá cotidiana de los derechos llingüísticos de los asturfalantes y coles declaraciones públiques y notes de prensa qu'emita l'Aconceyamientu, amás de dexar güecu p'artículos d'opinión sobre l'estáu y la evolución nel tiempu de la regulación xurídica del nuesu particular fenómenu llingüísticu "con claru envís didáuticu y críticu".

La web va ufiertar amás materiales práuticos d'interés en forma de formularios que podrán dir facilitando'l llabor y usu normal de la llingua asturiana a tolos profesionales del derechu. Otra de les ferramientes inxertes na web ye la base de datos Llingualex referida al fenómenu llingüísticu asturianu y tamién al enteru dominiu llingüísticu ástur-lleonés.

L'Aconceyamientu aprovecha la presentación de la web pa dar tamién a conocer los sos nuevos proyectos. Ente ellos rescamplen la creación d'un Observatoriu de Derechos Llingüísticos (ODLL) que promueva estudios y informes periódicos o un Serviciu d'Orientación Xurídica pa la Defensa de los Derechos Llingüisticos .