Xurde Fernández gana’l XX Premiu de Poesía ‘Fernán Coronas’ Padre Galo col so trabayu 'Difícil'

El poemariu ‘Difícil’, de Xurde Fernández, resultó ganador del XX Premiu de Poesía ‘Fernán Coronas’ Padre Galo qu’entrega la Sociedad Popular de la Regalina. El premiu fallóse la selmana pasada na casa natal del Padre Galo, en Cadavéu.

L’escritor candasín consigue asina un premiu de prestixu grande que lleva’l nome d’un de los escritores de referencia de la historia de la llingua asturiana. Según indica l’acta del xuráu, “las potentes imáxenes, la unidad temática ya formal del poemariu, ya´l dominiu ḷḷingüisticu del autor” llevaron a los sos miembros a escoyer por mayoría’l trabayu ‘Difícil’ como’l ganador.

Nesta edición del gallardón qu’entrega la Sociedad Popular de la Regalina’l xuráu tuvo conformáu por Félix Ferreiro Currás, Susana Sela Rodríguez, Carmen Guardado Parga y Miguel Rodríguez Monteavaro, amás de Mar Madera Coto, qu’unvió’l so votu per corréu.