Xurde Blanco presenta otra demanda contra’l Principáu

L' abogáu de l'Alministración autonómica Xurde Blanco tá pendiente de la resolución del Xulgáu de lo Contencioso Alministrativo d'Uviéu por una nueva demanda que presentó contra'l Principáu al nun tramitar l'alministración una solicitú de vacaciones que presentare por redactala en llingua asturiana. La vista del procesu celebróse ayeri na sala númberu dos del tribunal y amiéstase a la demanda que yá punxere Blanco por nun tramitar l'alministración una solicitú de permisu médicu redactada n'asturianu.

Nel primer xuiciu, la sala númberu trés nun se pronunció y. En cuenta d'ello llevó l'asuntu al Tribunal Supremu, entendiendo que podría existir un problema d'inconstitucionalidá d'un artículu de la Llei de Promoción y Usu del Asturianu, na que s'encontó'l lletráu pa presentar la demanda. Anque la resolución del xulgáu tien de conocese nunos díes, Blanco albidra que la sala segunda va echase al pie de lo que fexere la sala tercera y abúlta-y que va llevar l'asuntu al Supremu.