Xunta Moza va entamar una fuelga na enseñanza

L'anuncia de la convocatoria por parte de la organización xuvenil coincide cola denuncia pol sindicatu SUATEA de nuevos problemes na escolarización de la llingua.

La Xunta Moza, estaya de mocedá de la Xunta Pola Defensa de la Llingua, tien decidío entamar una fuelga nes enseñances medies del país. La fecha pa la convocatoria de paru ente los estudiantes d'ESO y bachileratu del país ye la del miércoles 23 de payares, según comentaron a Asturies.com fontes de Xunta Moza. Esi día la Xunta Moza va protestar tres d'alcontrar "los mesmos problemes del cursu pasáu na asignatura de llingua asturiana, onde se sigue "desviando" a otres "optatives" a los escolinos o onde dellos centros nun ufren la posibilidá d'escoyer llingua asturiana en tolos cursos" según declararon a Asturies.com representantes de Xunta Moza. La organización, que va facer oficial la convocatoria de fuelga en feches prósimes, diz tener conocimientu de que llega a dase'l casu d'atopar en centros a mayestros contrataos como de llingua asturiana pero que tan impartiendo na práctica otres asignatures como llingua castellana. Los representantes de Xunta Moza echen contra'l gobiernu PSOE- IX-BA que "fai publicidá engañosa pidiendo que la xente se matricule d'asturianu pa que dempués nun llegue a dase l'asignatura" lo que-yos lleva a pidir "menos campañes de publicidá y más normalidá nos institutos"

Ello coincidió nuna selmana en que'l sindicatu SUATEA denunció tamién el so esmolecimientu pol procesu pol que se ta mandando'l procesu d'alxudicación de places de llingua asturiana.

El sindicatu d'enseñanza condenó, a partir del casu concretu d'un docente apuntáu na lista d'asturianu al que nun llamaron pa cubrir una plaza de llingua, plaza qu'al final foi pa otra persona que nun taba apuntada nesta llista y que tenía menos nota, la situación xeneral d'irregularidá y arbitrariedá que se da na contratación del profesoráu pa l'asignatura de llingua. Al rau d'esti casu SUATEA diz que nun s'esplica qu'unes llistes cuerran más rápido qu'otres y denuncia qu'esta situación nun ye la primer vegada que se da, en cuantes que nel cursu anterior yá se dieron bien de casos asemeyaos en primaria y en secundaria. El sindicatu propón como una de les soluciones a esta "discriminación" que sufren los docentes d'asturianu el qu'Educación abra una segunda llista d'interinos amestada a l'actual que lleva tiempu escosada, lo mesmo que se fexo pa les asignatures de griego, alemán o llatín a últimos del cursu 2004-2005.