Xunta Moza entama una fuelga na enseñanza secundaria

La Xunta Moza, estaya de mocedá de la Xunta pola Defensa de la Llingua Asturiana, fizo pública la convocatoria d'una fuelga na enseñanza asturiana "en rempuesta a la nueva agresión que supón la propuesta de currículu de la Conseyería d'Educación pa secundaria, qu'afonda na situación yá marxinal de la llingua asturiana nel sistema educativu". La convocatoria de paru xeneral nos institutos de secundaria asturianos, que ta puesta pal día 22 de marzu, va acompañada d'una concentración a la una del mediudía na Plaza d'España, énte les oficines de la Conseyería d'Educación.

La Xunta Moza quier adelantase cola fecha de la convocatoria a la fecha prevista pa qu'Educación asoleye'l curriculum de secundaria, calteniendo asina la presión sobre l'organismu responsable de polítiques educatives d'Asturies dempués de la manifestación del pasáu 17 de febreru contra'l borrador de currículum d'enseñanza primaria, nel que l'asignatura d'asturianu apaecía prácticamente como una optativa en competencia con otres materies curriculares. Xunta Moza yá organizare nos últimos años dos fuelgues na secundaria asturiana en defensa d'una meyor situación de l'asignatura d'asturianu. Dende la organización entienden qu'esta vegada hai más motivu p'aparar los institutos.


La Xunta Moza negocia nestos momentos la posible amestadura a la convocatoria d'otres organizaciones como'l sindicatu d'estudiantes y organizaciones de mocedá de partíos del ámbitu asturianista .