Xunta Moza entama güei una fiesta con K-Nalón

La estaya de mocedá de la Xunta pola Defensa de la Llingua Asturiana -Xunta Moza- tien una fiesta güei vienres 13 nel chigre de l'asociación, La Casa Posafuelles n'Uviéu. La música nesa fiesta va ponela'l grupu d'hip hop n'asturianu K-Nalón.

El conciertu ye esti vienres día 13 a les 22:00 hores na Casa Posafuelles, que ta na cai Cuesta la Vega nº 10, y la entrada ye de baldre. K-Nalón ye ún d'esos grupos que ta dando-y puxu a la escena hiphopera d'Asturies, concretamente nes cuenques, onde l'ambiente del rap y l'hip-hop ta viviendo una gran vitalidá. Un exemplu de la so música ta calistrando nel públicu asturianu ye qu'ún de los sos cantares -concretamente "Comparte"- ta recibiendo votos abondos nel Premiu Asturies.com al Meyor Cantar n'Asturianu 2005. K-Nalón vienen de Llangréu, llugar onde se xuntaron los sos componentes, el cantante Tori y l'encargáu de facer les bases Ceeris. Amás d'ellos dos, en K-Nalón tamién topamos a Arma X -cantante de Stoned Atmosphere- faciendo voces y al qu'ellos presenten como " El nietu Maricarme" trabayando nos platos. Pa sentir daqué d'ésti y d'otros grupos d'Hip Hop asturianos convidamos a los nuesos llectores a sentir la emisión, inda en prebes de Radio d'Asturies.com Canal Hip-Hop.