Xunta Moza convoca’l IV Concursu Lliterariu Amor pola Llingua

Les persones interesaes en participar nel IV Amor pola Llingua yá pueden unviar les sos frases, eslóganes o microrellatos. Xunta Moza entama esti concursu lliterariu coincidiendo col Día Internacional de la Llingua Materna (21 de febreru).

Tolos testos presentaos han de tener una estensión máxima de 140 carauteres, 124 p’aquellos qu’escueyan Twitter –usando’l hastag #amorpolallingua– pa facer llegar les sos creaciones. Los otros métodos d’unvíu son Facebook, el corréu electrónicu amorpolallingua@gmail.com o’l postal, na direición siguiente: La Gascona 12, 3u; 33001, Uviéu. Tolos trabayos, en prosa o en versu, han de ser inéditos. Nellos los concursantes espresarán el so sentir hacia la llingua del país. 

El plazu pa presentar les frases –nun hai un tope por persona– termina’l 21 de febreru, Día Internacional de la Llingua Materna, a les 00.21 hores, anque’l ganador nun se conocerá hasta’l vienres 22, cuando ta previstu un actu cultural nel Centru Social Autoxestionáu La Madreña a les 21 hores. La organización pide a los participantes qu’acudan a él pa recoyer el premiu, consistente en material de la Xunta pola Defensa de la Llingua Asturiana (XDLA) y de Xunta Moza, amás de llibros n’asturianu, nel casu de que resulte gallardonáu. La vencedora na edición pasada foi Mónica Álvarez Viña col mensaxe ‘¡Echa la llingua a placer!’.

Con esti concursu lliterariu, la estaya de mocedá de la XDLA pretende aprovechar esta fecha a favor del plurillingüísmu y la diversidá llingüística pa difundir esti mensaxe y visibilizar la situación del asturianu.