Xunta Moza apurre datos sobre la fuelga nos Institutos asturianos

La fuelga que convocare la organización Xunta Moza nos Institutos de secundaria d'Asturies en reivindicación del derechu a la escolarización del asturianu tuvo a lo llargo d'esta mañana un seguimientu mui altu n'Uviéu y les Cuenques.

Según datos provisionales colos que cuenta la organización, nos IES d'Uviéu diose un siguimientu del paru de más del 80%, consiguiendo que parasen dafechu dellos de los institutos más importantes de la capital, ente ellos el Naranco. Los dos IES de Siero rexistraron un paru dafechu, neto que los centros de secundaria de Candás, Mieres y Pola L.lena. Otros centros d'enseñanza como Lluanco perpasaron el 90%, mientres que l'IES de Ciañu (Llangréu) rexistró una ausencia a les clases de más del 50% del alumnáu, siempre según datos provisionales apurríos por Xunta Moza, qu'apunta qu'hebo un siguimientu dafechu del paru nel IES de Cangues d'Onís y un 20% nel de Parres.

Como puntu fuerte del paru convocáu pa esta mañana, la estaya de mocedá de la Xunta Pola Defensa de la Llingua Asturiana organizaba tamién una concentración de protesta énte les oficines de la Conseyería d'Educación n'Uviéu, momentu que recueye la semeya qu'acompaña esta información. Más de 200 persones asistieron a la concentración, que se llevó alantre con total normalidá y que se convertió nuna manifestación espontanea que salió de la sede de la Conseyería d'Educación hasta llegar a la puerta de la Xunta Xeneral del Principáu.