Xuníos Podemos lleva la supresión del peaxe del Güerna al Congresu

|
Xuníos Podemos lleva la supresión del peaxe del Güerna al Congresu

La concesión, que finaba nel 2021, amplióla'l Gobiernu d'Aznar hasta'l 2050 nel añu 2000.

El grupu parllamentariu confederal Xuníos Podemos-En Comú Podem-En Marea presentó esta mañana una proposición non de llei sobre la supresión del peaxe del Güerna pal so alderique y votación nel Congresu. Nél insta al Executivu a espublizar nel portal de tresparencia l'espediente de contratación del proyeutu d'obra y de la obra, l'espediente alministrativu de la concesión y los estudios esistentes de demanda de tráficu; derogar el decretu qu'amplió la concesión con Francisco Álvarez-Cascos como ministru de Fomentu; estudiar el costu de rescisión pa suprimir el peaxe nel 2021; y establecer fórmules pal mantenimientu de les víes rápides que contemplen la eliminación de los peaxes.

"Los asturianos y asturianes sufrimos ún de los peaxes más caros d'España", recordó'l diputáu Segundo González García, qu'añadió que l'ampliación de la concesión "fíxose ensin xustificación aparente", polo que considera que "hai qu'acabar con esta discriminación". "Hai muncho que sospechar sobre esti peaxe porque nel añu 2000, cuando se produxo la prórroga, hacía 3 años de la venta de la empresa Aucalsa, que yera una empresa que formaba parte de la SEPI, a un consorciu d'empreses lideráu por Sacyr, que figura na contabilidá B acreditada pol xuez Ruz como una de les que donaben en B al Partido Popular", destacó.

Pela so parte, el secretariu xeneral de Podemos Asturies, Daniel Ripa, apuntó que "nun ye llícitu que nos sigan espoliando a los asturianos. 35 años de concesión dan de sobra p'amortizar el peaxe del Güerna: 26 euros por entrar y salir d'Asturies o 67 euros pa dir d'Asturies a Madrid; el viaxe mediu más caru de tol norte d'España". "Creemos que ye lóxico y de xusticia" la so supresión, siguió, pa depués señalar que con esta proposición non de llei'l "Partido Popular y Partido Socialista van tener que votar y dicir de manera nidia si quieren o nun quieren lliberalizar el peaxe del Güerna, y si nos van poner una fecha pa que yá nun se pague nin euru más" y terminar asina con esta barrera que "perxudica a la nuesa economía y a los nuesos esiliaos, que mayoritariamente tán en ciudaes como Madrid y tienen que pagar por tornar a casa".

Na imaxe, el viaductu Inxenieru Carlos Fernández Casado nel Güerna. Semeya baxo llicencia CC BY-SA 2.5.

Contador Estadistiques