Xune Elipe y Sergio Rodríguez recuperen el proyeutu Soncai System

El cantante Xune Elipe y el productor Sergio Rodríguez tán trabayando nel estudiu no que va ser el segundu discu del proyeutu Soncai System. L’álbum va siguir la mesma llinia que ‘Clashturies’, anque va ser más llatinu y baillable.
 
Cinco años depués de la espublización del primer trabayu de Soncai System, que recibió perbones crítiques, n’especial fuera d’Asturies, Elipe y Rodríguez decidieron retomar esti proyeutu aprovechando’l baxón de conciertos que se ta viviendo esti branu, lo que facilita la posibilidá de xuntar a tolos músicos que participen nél. “Ye un discu d’estudiu, nel que nun hai ensayos. Sergio prepara unes bases y sobre elles trabayamos los demás”, esplica Elipe, que vuelve a contar pa esti discu –tovía ensin nome definitivu– colos mesmos collaboradores qu’en ‘Clashturies’. Asina, Miguel Herrero trabaya colos vientos y los teclaos; Vito y Aique, cola voz; DJ Pimp, colos scratches; Dani Anti-Stylo, rapeando y coles programaciones; y Rubén Bada, col bouzouki, ente otros músicos y cantantes.
 
“Nestos momentos tenemos preparaes unes seis o siete bases, a les qu’inda-y falten meter arreglos y terminar d’encaxar la lletra”, esplica Elipe, qu’avanza que l’álbum “va ser más llargu que l’anterior, con 13 o 14 temes”, ente les que va haber dalgún instrumental y una versión, tovía por concretar. “La llinia del discu ye más electrónica, con menos batería y más programaciones. Tamién más llatinu, siempre sobre les bases del reggae, dub y ska, y más baillable”, continúa’l cantante. No que respeuta a les lletres, toes n’asturianu, Soncai System va contar cola participación de dellos autores, anque nesti trabayu va tener más pesu’l periodista y responsable d’Ediciones Seronda, Francisco Álvarez. La intención de los músicos ye aprovechar la segunda quincena d’agostu pa terminar de dar forma al discu, cola idea de facer un avance del mesmu n’ochobre y sacalu a la venta al pocu tiempu.
 
Posibilidá de llevalu al direuto
 
Una de les cuestiones que tán estudiando Elipe y Rodríguez ye la posibilidá de llevar el proyeutu Soncai System al direuto, dalgo complicao pola cantidá de músicos involucraos nél. “La intención sería facer dalgo puntual: trés o cuatro conciertos”, apunta Xune. Nun primer momentu, éstos tendríen llugar n’Asturies, anque tres la bona recepción que tuvo ‘Clashturies’ fuera de les nueses llendes nun se descarta la posibilidá de facer dalgún n’otros llugares.