Xune Elipe acompaña como númberu 2 a Cova Tomé na so candidatura a les primaries de Podemos

Covadonga Tomé, ex vocera de Podemos, presenta candidatura a les primaries de la formación morada de cara a les eleiciones de mayu. La valdesana va tar acompañada pol asturianista Xune Elipe, con esperiencia como conceyal n’Avilés, qu'ocupa'l númberu 2 de la llista, y pol ex diputáu Andrés ‘Ron’ Fernández Vilanova.

La carrera por liderar la llista eleutoral de Podemos arrancó güei cola aperturar del plazu pa presentar candidatures. La primera que s’oficializa ye la que lidera Cova Tomé, pediatra del Hospital Grande Covián, asitiada nel sector críticu cola coordinadora autonómica, Sofía Fernández Castañón.

“Preséntase a las primaries porque cree nuna Asturies con una sanidá fuerte, con un repartu de la riqueza xustu, con oportunidaes pa toos y toes, vivan n’Uviéu o n’Ayer”, apunten dende la candidatura de la coordinadora del área de Sanidá en Podemos ente’l 2017 y 2021, que fora tamién vocera del partíu, encabezando les negociaciones col Gobiernu en materia presupuestaria. Rescamplen d’igual forma que “conoz de primer mano les necesidaes de l’Asturies vaciada nun momentu onde la nuesa tierra ta a piques de perder el millón d’habitantes. Representa un Podemos onde les persones de la sociedá civil pasen tamién a primer llinia de la política. Un Podemos que mira al futuro y que busca garantizar que quepa tol mundu, p’asegurar la diversidá y pluralidá na organización”.

Faise acompañar na candidatura por Elipe, que da’l pasu al creer “que Podemos Asturies ha trescender y abrise a la sociedá asturiana”, señalen. Tamién va tar nes primeros puestos Ron, impulsor de Podemos nel 2014, que pretende contribuyir a “recuperar l’allegría y l’espíritu del 2015, recuperar la ilusión y la xunión d’un movimientu que partió nes cais y que consiguió tirar abaxo la puerta de les instituciones pa facer política d’otra forma en favor de la xente corriente y ensin ceder a les presiones de los poderosos”.

Fernández Castañón o Alba González

Tomé va disputar el númberu 1 na llista de Podemos cola candidata del sector que lidera agora’l partíu, con Fernández Castañón y el voceru parllamentariu, Rafael Palacios, como cabeces visibles. Nes últimes hores garra fuercia l’apuesta por Alba González, anque nun se descarta que Fernández Castañón finalmente pudiera presentase.

Na semeya, Elipe, Tomé y Ron.