Xunca Records lleva a Xixón ska y punk-rock internacional

Ska y punk-rock internacional tornen a Asturies de la mano de Xunca Records. El sellu asturianu va llevar a Xixón per cuartu añu a los italianos Talco, acompañaos esta vez de los italo-catalanes La Mâquina.

El próximu vienres 8 d’abril na Sala Acapulco de Xixón va dase esta afayadiza cita pa los amantes del ska, rock y punk reivindicativu. Los venecianos Talco aporten como cabeza de cartel pa presentar el so últimu trabayu, “La cretina commedia”, un discu n’homenaxe a Peppino Impastato, activista italianu que dedicó la so vida a lluchar contra la mafia.

El conciertu en Xixón de Talco, per cuartu añu siguíu de Xunca Records, enmárcase na xira que'l grupu va facer na primer quincena d'abril nel Estáu español, y sedrá ésti la única actuación en tol noroeste peninsular.

La Mâquina
La otra dosis musical de la nueche va inyectala La Mâquina, banda italo-catalana que va xirar per tola península xunto a los mentaos Talco. N’Asturies, va ser la primer vez que se-yos puea ver enriba un escenariu presentando “Acción”, el so discu debú.

“Internacional y internacionalista”, asina defínese esti grupu que trabaya un estilu ente'l combat rock y el punk con pingarates de ritmos xamaicanos y llatinos. Amás, destaquen ente los sos componentes persones que formen o formaron parte de bandes como Fermín Muguruza Dub Manifest, Banda Bassotti, La Kinky Beat o Discípulos de Otilia.