Xulio Viejo abre'l ciclu de conferencies científiques n'asturianu

Esti martes 22 entama a les 19:30h nel Centru Cultural "Antiguu Institutu" de Xixón el ciclu de conferencies n'asturianu "l'asturianu sí tien ciencia", organizáu con motivu de la declaración del añu de la Ciencia n'España, una celebración que quier averar los descubrimientos y llabor de los científicos de toles rames del saber al públicu xeneral. El ciclu va ser el primeru de divulgación científica de les sos característiques que se faiga col asturianu como llingua vehicular de toles ponencies. Cuatro conferenciantes van ser los encargaos de poner les charres, qu'entamen esta tarde cola participación del llingüista Xulio Viejo, que va falar de "La Ciencia Llingüística y el mitu de la llingua", na que l'investigador va facer un repás a los mitos y discursos históricos sobre'l llinguaxe cola voluntá d'aclariar términos y ayudar a estremar los componentes políticos de los puramente científicos que se dan nel debate sobre la llingua.