Xulio Ramos pon música a la obra d'Andrés Solar

Poco enantes de la so desgraciada muerte, Andrés Solar taba metíu nuna auténtica ferviella d'actividá. Poques estayes-y quedaben por tocar al escritor de Deva, que naquel 1984 yera un activu militante nel terrén de la reivindicación llingüística al mesmu tiempu qu'entamaba una participación política nel Ensame Nacionalista Astur. Ello tampoco nun-y quitó tiempu pa siguir dedicándose a la lliteratura y l'actividá cultural, trabayando muncho n'aquel tiempu col grupu de teatru Xaréu y, por supuesto, escribiendo. Precisamente ente aquellos últimos poemes qu'escribió, hebo una riestra d'ellos qu'Andrés entregó a Xulio Ramos, d'aquella ún de los másimos esponentes del nuevu canciu astur, el movimientu musical qu'acompañó, casi en paralelo, a la lliteratura del surdimientu.

Andrés nunca nun llegó a ver musicaos los sos escritos, pero tres de la so desapaición, Xulio Ramos entamó xunta Carlos José Martínez un llabor compositivu con aquellos poemes y otros testos d'Andrés Solar hasta facer d'ello la cantata "Solar d'Amor y arume verde" una pieza de dalgo más d'una hora de duración que, en palabres de los sos autores, fuxe de tolos tópicos asturianistes pa facer una obra de calter universal. La cantata estrenóse va agora cuatro años nesti mesmu escenariu, pero la ocasión de la Selmana de les lletres paecía puesta a costafecha pa recuperar esta obra y llevala a un nivel mayor de calidá na representación. Asina, más de cincuenta músicos van participar nesta obra sinfónica dirixida por Carlos José Martínez. Valga como anécdota dicir que "Solar d'amor y arume verde" amiesta ferramientes como instrumentu de percusión, casu del cabruñu, pero ello nun quier dicir que seya una obra estrada de tópicos sobre l'aldea, como s'encarguen de recordar los sos propios autores.

La cantata nun va recuperase solo pa esta estrena, y asina, xunta la representación d'esta tarde nel Teatru Xovellanos, la casa de discos Piramily Records ta acabante d'asoleyar la edición en CD de la cantata, que se grabó en vivo na ilesia de Contrueces cola participación del Orfeón Xixonés, el tenor JoséRamón Alonso y la soprano Paula Lueje. La edición en discu inclúi una presentación bien curiada, axuntando'l llibretu de la obra n'edición trillingüe asturiana, castellana y inglesa.