Xulio Arbesú repite nos Talleres de Llectura n'Asturianu de Nava

Nesta ocasión va falar de la so novela 'Eternu negociu', Premiu Narraciones Trabe del 2011.

Los Alcuentros colos Llectores del Taller de Llectura n'Asturianu de Nava, entamáu pol Serviciu de Normalización Llingüística de la 'Comarca de la Sidra', tornen a contar cola participación de Xulio Arbesú. N'abril del añu pasáu l'autor entreguín charró colos presentes de la so novela 'El valor del rei' y agora repite la esperiencia.

Va ser con 'Eternu negociu', "una obra enllena d'humor que cunta les peripecies del empresariu Martín Vallina a la busca d'un matrimoniu afayadizu". El cinco veces ganador de los Premios Lliterarios, con trés Xosefa Xovellanos de novela ('Potestas', 'El pisu d'enriba' y 'El valor del rei') y dos Máximo Fuertes Acevedo d'ensayu ('El destín treshumanu' y 'Los deseos del dineru'), va alcontrase colos sos llectores esta tarde, a les 19 hores, na sala Marta Portal de la Casa la Cultura de Nava.