Xulio Arbesú gana’l Máximo Fuertes Acevedo d’ensayu y Quique Faes, el Xosefa Xovellanos de narrativa

El trabayu de Xulio Arbesú ‘Los deseos del dineru’ llevóse’l XVIII Premiu Máximo Fuertes Acevedo d’ensayu qu’entrega la conseyería de Cultura. Mentes, el XXXIII Premiu Xosefa Xovellanos de novela foi pa Quique Faes por ‘La vida increíble’.

'Los deseos del dineru' estripa la rellación "irracional", al xuiciu d’Arbesú, qu'esta sociedá  tien col dineru, hasta'l puntu de tornalu nun fin en cuenta d'un mediu col que vivir, según esplicó’l propiu autor tres conocer el fallu del xuráu formáu polos escritores Lluis Portal Hevia –ganador de la edición anterior–, Roberto González-Quevedo y el caderalgu d'Historia Medieval de la Universidá d'Uviéu, Javier Fernández Conde. Ana Fueyo, direutora xeneral de Política Llingüística, exerció de presidenta. L'acta destaca "l'usu áxil de la llingua, l'actualidá del tema y la forma d'harmonizar narración y xéneru ensayísticu" del testu d'Arbesú, presentáu col nomatu ‘Rockefellerín’, que recibe una recompensa de 4.000 euros.

L’autor matiza que nun ye una obra sobre la crisis, anque ye ésti un tema al que dedica bona parte del ensayu, sinón sobre la "rellación irracional" que tenemos col dineru. Asina, desmonta tópicos talos como que "lo más caro ye meyor", o que'l dineru "si nun otorga la felcidá, polo menos ayuda a llograla". Dedica un capítulu, sicasí, a señalar que ye nececesario tener dineru na sociedá actual, pero "el problema ye cuando pasa de ser un mediu a ser un fin", comenta Arbesú, veteranu escritor en llingua asturiana que trabayó de manera principal la narrativa y l’ensayu.

Mentes, ‘La vida increíble’, de Quique Faes, resultó ganadora del XXXIII Premiu Xosefa Xovellanos de narrativa tres ser escoyida por unanimidá como la meyor de les seis participantes pol xuráu formaú por Xandru Fernández –ganador de la edición anterior–, Inaciu Llope y Penélope Miranda, y presidíu tamién por Fueyo. Según l’acta, valoróse que se trata d’una novela mui bien construyida, con unos personaxes claramente definíos y qu’aporta a la lliteratura asturiana horizontes temáticos nuevos. El testo ganador, que recibe 4.000 euros de recompensa presentóse baxo’l nomatu 'Belarmino Malospelos'.

Faes, llicenciáu en Periodismu y doctor en Ciencies Polítiques pela UNED, exerció como redautor en medios asturianos como El Comercio, La Nueva España, Estrella Digital y Asturnews, y tien espublizaes delles obres, ente les que s’atopa 'L'agobiante imperfección de les coses' (Trabe, 2004). Amás, ta acabante de ganar el Premiu de Rellatu Curtiu Fernández Lema por ‘Un diariu pal xuez Oliveros’.