Xube'l recibu de la corriente, mengua l'ayuda a les renovables

Si va un añu la noticia yera la llegada del euru, qu'acabó poniendo la inflación peles ñubes, esti añu entra con xubes, yá aprebaes, en dellos servicios básicos. Ente elles rescampla la del recibu de la corriente, que, nesti primer añu de la lliberalización eléctrica que va permitir escoyer que compañía queremos que nos dea serviciu, va xubir el 1,5% pa particulares y el 2% pa les empreses. Paralelamente a esta xuba, que les grandes eléctriques demandaron pol pocu marxe de beneficiu qu'obteníen, el Ministeriu d'Industria ta acabante de mete-yos un taragañazu a les enerxíes renovables, que l'alministración vien subvencionando a tanto'l kilowatiu dientro d'un plan xeneral qu'afala al espoxigue d'estes fontes non-contaminantes. El ministeriu de fomentu entiende que les renovables tienen márxenes de beneficiu cada vez mayores y qu'en consecuencia yá nun tienen falta de tanta protección oficial. Ello ye que'l kw/h d'enerxía hidráulica en minicentrales va recibir nesti 2.003 un 2% menos de subvención. La tixera presupuestaria ataca enforma a la eólica, que pierde'l 8% de l'ayuda oficial a cuenta del meyor rendimientu de los xeneradores, mientres que la solar queda como taba, con 66 pts/kw y namás xube la de biomasa que yera la que menos subvención tenía hasta agora.Esta decisión ministerial vien a contradecir los propios planes del gobiernu y de la UE, que manda, por directiva, que pal añu 2.010 el 12% de la corriente que se produza en cada estáu de la Unión tien de ser de renovables, dañando amás l'enfotu empresarial y inversor nestes enerxíes non contaminantes. Luis Díaz, xerente d', única empresa asturiana que produz dafechu con renovables, esplicó-y a Asturies.com que el fechu de menguar estes ayudes el mesmu añu en que xube'l preciu pal consumidor supón, aparte d'una contradicción, un frenu a la inversión nestes fontes d'enerxía, en cuantes que les entidaes financieres, qu'hasta agora poníen hasta'l ochenta per cientu del capital, van enfotase menos n'invertir en proyectos de xeneradores eólicos, minicentrales o parques fotovoltaicos.

Contador Estadistiques