Xuan Santori presentó la primer tesis doctoral n’asturianu tres la entrada en vigor del Reglamentu nuevu

Una tesis doctoral sobre los escritores del Surdimientu, fecha por Xuan Santori y dirixida por Ramón d’Andrés, foi la primera fecha n’asturianu baxo’l Reglamentu d’Estudios de Doctoráu nuevu. El filólogu recibió sobresaliente cum laude.

‘El papel de los escritores del Surdimientu na recuperación del asturianu: la visión del escritor’ ye’l nome d’esta tesis doctoral que pasa a la historia por ser la primera tramitada dafechu en llingua asturiana. La entrada en vigor del Reglamentu d’Estudios de Doctoráu nuevu, aprobáu en xunetu, permitía esta opción tres una llarga reivindicación de profesores, alumnos y coleutivos como’l Conceyu Universitariu pol Asturianu (CUPA), yá que’l borrador de la norma namái permitía l’usu del español y d’otros idiomes oficiales de la XE, previu informe de la Comisión Académica del Programa de Doctoráu.
 
La investigación del filólogu y escritor Xuan Santori Vázquez céntrase na influencia de los escritores n'asturianu nel movimientu lliterariu y sociocultural llamáu Surdimientu, qu'entamó nel añu 1974. L’autor estudia esta influencia al traviés de la percepción de los propios escritores, gracies a los datos llograos nuna macroencuesta fecha a práuticamente tolos escritores n'asturianu. La gran cantidá de datos estadísticos que consigió con ella Santori, permitió-y facer un retratu esceicional de les interioridaes y carauterístiques del mundu lliterariu asturianu nos 30 años últimos. El tribunal, que destacó la metodoloxía novedosa utilizada nel trabayu, aplicable a otres llingües minoritaries, tuvo presidíu pol catedráticu asturianu afincáu na Universidá del País Vascu, Dr. Francisco José Llera Ramo, autor d'importantes trabayos sobre sociollingüística asturiana.