Xuacu Rodríguez: "La esmolición de Podemos Asturies ye siguir plantándo-y cara a la FSA"

|
Xuacu Rodríguez: "La esmolición de Podemos Asturies ye siguir plantándo-y cara a la FSA"

La polémica surdida en Podemos poles dimisiones en delles conseyos ciudadanos autonómicos y la destitución de Sergio Pascual y la so sustitución por Pablo Echenique nun chisca de momentu a Podemos Asturies. Xuacu Rodríguez Morón, responsable d'Organización, afirma qu'hai normalidá absoluta en tolos órganos de la formación nel país.

Entrugáu pola apaición nos medios d'una pequeña corriente crítica n'Asturies dientro de la organización morada, de nome Xunt@s se Puede, Rodríguez Morón quita fierro al asuntu,  y apunta que "en Podemos ye normal que cualquiera pueda dar la opinión y tolo que sía contribuyir a ameyorar ye bienllegao".

A diferencia de lo asocedío n'otros territorios, como La Rioja, Comunidad de Madrid, Galicia, Euskadi y Cantabria, "n'Asturies, tres los procesos eleutorales, siguimos reorganizándonos y funcionando con absoluta normalida en tolos órganos del partíu", añade.

"La única esmolición de Podemos Asturies ye siguir plantando cara a la FSA y contribuyir al gobiernu del cambiu a nivel estatal", afirma Rodríguez Morón, presente güei en Madrid pa un conceyu ordinariu ente Pablo Iglesias y los secretarios xenerales y responsables d'organización de tolos territorios, y na que s'escoyó, a propuesta de Pablo Iglesias, a Pablo Echenique pa sustituyir a Pascual.

La llucha Iglesias-Errejón

Sobre la polémica llevantada pol cese de Sergio Pascual, Secretariu d'Organización estatal y consideráu mano derecha d'Íñigo Errejón, señala que Podemos Asturies asitiase'l al marxe de la polémica. Darréu, cuestionáu pol posicionamientu que tomaría la organización nel país nel casu de que se-yos encamiente a decantase por Iglesias o Errejón, afirma que "esti supuestu enfrentamientu ente los dos nun ye real y ye alimentáu por dellos sectores de la prensa".

Contador Estadistiques