Xuacu Amieva y "Four men and a dog" prenden la Folixa de Mieres

La banda de Xuacu Amieva entama a les once de la nueche d'esti vienres les actuaciones musicales de la edición 2007 de la Folixa na Primavera de Mieres, que va inaugurar a les 8 de la tarde la llectura del pregón pola escritora y collaboradora d'Asturies.com Mari Luz Pontón y na que'l grupu Felpeyu va recibir el Distintivu "Fini Suárez" en reconocimientu al so llabor pola música tradicional asturiana.

Tres de l'actuación del gaiteru asturianu, que va presentar el so discu "seis" van xubir al escenariu los irlandesos "Four Men & a Dog" un cuartetu creau nel añu 1990 qu'amiesta folk irlandés tradicional con un bon báramu de palos musicales d'otros llugares, allegándose dacuando al country o'l rock.

El sábadu la Folixa va entamar les sos actividaes a les once y media de la mañana cola actuación del grupu folclóricu "Ruxidera" mientres que la tarde va animala'l concursu de gaita "memorial "Chema Castañón" y un certame de tonada. Teatru na cai y xuegos tradicionales pa neños van entretener a tolos asistentes dende les 7 de la tarde, entamando pela nueche les actuaciones de rellume d'esta Folixa 2007, col grupu asturianu "Skanda" que s'alcuentra grabando'l que va ser el so nuevu discu "el cuartu" y colos bretones "Gwendal", mítica formación de la escena celta formada nos años 70.

Amás de la música, la Folixa tien una parte gastronómica importante. Los restoranes collaboradores ufierten estos díes un menú especial con platos como sopa d'ablanes o menestra, mientres que diez llagares asturianos van apurrir más de 5.000 llitros de sidra que va poder prebase ensin más gastu que mercar el tradicional vasu al preciu de 2,5 euros.