Xuacu Amieva recibe un homenaxe n'Uviéu

L'eventu celébrase dientro de los festexos de L'Ascensión que vive estos díes el conceyu.

La Fundación Municipal de Cultura del Ayuntamientu d'Uviéu y l'Asociación Tertulias en Llanes entamen un conciertu-homenaxe a Xuacu Amieva, ún de los padres de la revolución de la gaita na década de los 80. Van ser cerca de dos hores de música presentaes por Esther Fonseca nos que'l propiu gaiteru va participar col so grupu Dobra, amás de la Banda Gaites Naranco, la Batucada Matu na Cai y O'Carolan.

Tamién va haber delles collaboraciones, como les cantantes Aurora Pazos, Marta Arbás, Marta Elola, Xosé Antón Fernández 'Ambás' y Anabel Santiago, los gaiteru Carlos Rebollar y José Tejedor, y los musicos Dani Pando (trompa), Daniel Lombas (bodhrán), Elías García (bouzouki), Emilio Fidalgo (guitarra), Javi Méndez (baxu), Javi Monge (guitarra), José Manuel López (acordión), Paula Alonso (viola), Pedro Pangua (tambor), Rubén Mol (batería) y Wendi Harwood (violín), amás de la pareya de baille del grupu Xeitu formada por Paulino Santirso y María Vázquez. L'actu va celebrase mañana, a les 20 hores, nel Teatru Filarmónica, con entraes a 12 euros.

En La Llosa

Güei echó a andar L'Ascensión, que va desendolcase esta fin de selmana en La Llosa, con actividá tamién na plaza de la Catedral y Porlier, llugares onde va tar instaláu'l Mercáu Astur. Esta fiesta d'homenaxe a les muyeres y homes del campu asturianu va continuar el día 19 col entamu de la feria de ganáu en Lluniego.