“Xosé Bolado prefería la palabra Resurdimientu; fala d’una continuidá de la lliteratura asturiana”, cuenta Iglesias Cueva

“Nun ye casualidá que’l llibru ‘Antoloxía poética del Resurdimientu’ del añu 89 lu titulara asina”, apuntó Xosé Ramón Iglesias Cueva na presentación de la obra ‘Palabres blanques’ dedicada a Xosé Bolado nel marcu de la XLIV Selmana de les Lletres Asturianes que lu homenaxa. L'espertu faló sobre la so figura como críticu lliterariu afondando no que rellata nel so artículu ‘El faru imprescindible’.

Iglesias Cueva acompañó a Berta Piñán, conseyera de Cultura, Política Llingüística y Turismu, y Marta Mori, compiladora de ‘Palabres blanques. Testos d’Historia y Crítica lliteraria (Esbilla)’, editáu por Trea, nun actu que se desenvolvió’l sábadu pela mañana nel xixonés Muséu Nicanor Piñole. Foi’l terceru n’intervenir, completando una xornada que se centró nel llabor de Bolado como críticu lliterariu y como investigador d’historia lliteraria depués de que’l día anterior la so vida y obra poética centrara l’actu inaugural de la Selmana de les Lletres.

“El llabor de críticu ye un llabor difícil y abegosu, y n’Asturies más al ser una comunidá tan pequeña, onde nos conocemos. Non siempre’l llabor del críticu consiste en xulgar y opinar sobre la creación artística, nesti casu la creación lliteraria, y non tol mundu recibe bien eses crítiques. Ensin embargu, pa que’l llabor del críticu seya granible, seya eficiente, ye importante que seya aceptada esa crítica, y Xosé Bolado llogrólo. Llogró que les sos opiniones, el so llabor críticu, fuera aceptáu. Por eso yo quería entamar diciendo esto precisamente: l’aceptación xeneral siempre de les opiniones de Bolado”, arrancó’l secretariu de l’Academia de la Llingua Asturiana (ALLA).

Siguió apuntando que se debe “non sólo a la so intelixencia, siempre certeru nes opiniones, sinón sobre too al carauter, esi carauter falatible que tenía Bolado, que miraba con esos güeyos arrebellaos qu’escuchaben siempre, que suxeríen siempre, pero que nunca mandaben nin imponíen. Yera como una escucha continua, y eso traduzse depués na recepción que se fai de les crítiques. Eso permitió’l ser y significar lo que significa pa la crítica asturiana”.

Asina esplicó que dedició titular l’artículu ‘Xosé Bolado: el faru imprescindible’, al consideralu un faru pa la nuesa lliteratura “que yo quixi entendelu nun doble sentíu: un faru que de dalguna manera orienta les distancies llargues, el finxu del cielu siempre claru pa ónde tien que dir la lliteratura asturiana; y dempués tamién un faru curtiu qu’enfoca los poetes, los poemes, los versos completos, y fai que de dalguna manera valoremos, que ye otra de les funciones del críticu”.

Dos pegollos fundamentales

No que respeuta a esi faru llargu “quixi sorrayar dos aspeutos na trayeutoria crítica de Bolado qu’apaecen en delles vegaes nos sos testos: nun llau na idea de continuidá de la lliteratura asturiana, y d’otru llau, l’avenceyamientu que tien la lliteratura a la llingua. Dos pegollos fundamentales pa la lliteratura asturiana, que se resuelven nos años 80, pero que por desgracia siguen munches vegaes comentaos güei magar que tán superaos”. Poro, trató de “sorrayar y refugar” esa idea “d’una lliteratura inventada, una llingua inventada, etc.”.

“Entós, efeutivamente, fala d’una continuidá de la lliteratura asturiana. Nun ye casualidá que’l llibru ‘Antoloxía poética del Resurdimientu’ del añu 89 lu titulara asina, Resurdimientu. Él prefería la pallabra Resurdimientu que la pallabra Surdimientu, que depués foi la que trunfó y la qu’emplegamos práuticamente toos. Él prefería Resurdimientu porque él entendía que non naz, nun surde, la lliteratura asturiana allá nos años 70 o 80; tien una historia detrás magar que nesti país seya desconocida pola mayoría de la xente. Hai una historia y non, polo tanto, una ruptura”, esplica Iglesias Cueva.

“Cuando güei dalgunos falen del inventu como si fuera una lliteratura qu’apaeción antesdayeri... Non, hai una historia que debería ser enseñada nos centros d’enseñanza y que tolos asturianos deberíen conocer y que, por desgracia, la mayoría, y si non tolos que tamos equí, pasamos peles aules, tenemos títulos y nunca enxamás se nos faló de nengún autor d’esa lliteratura”, recordó darréu.

Na so intervención señaló que nesta reivindicación que fai Bolado del Resurdimientu nel añu 95 tamién refuga l’estudiu por xeneraciones, una cuestión d’actualidá depués de que nel 1994 José Ángel Cilleruelo asoleyara l’antoloxía ‘Nórdica’, “una de les antoloxíes más importantes que tenemos de la lliteratura del Surdimientu. Na introducción y nel prólogu fala nun titular de lo qu’él llama ‘una tradición reciente’, y Bolado refuga esa idea: nun ta naciendo nos años 90. Insiste nesa idea de Resurdimientu y al mesmu tiempu fala de qu’a él nun-y convence esa división xeneracional ente primer xeneración y segunda xeneración del Surdimientu”.

Al empar “diz qu’hai que relleer meyor a los que dalgunos llamen primer xeneración del Surdimientu y ver que non too yera realismu”. Nesi sen, cita a Xuan Xosé Sánchez Vicente o Manuel Asur como exemplos.

En segundu llugar, “él fala siempre de la lliteratura asturiana venceyada a la llingua asturiana. El riesgu nel qu’él insiste en delles vegaes ye convertir la lliteratura nuna lliteratura ritual. El futuru de la lliteratura asturiana va dir apareyáu al futuru de la llingua asturiana. Nun hai qu’escaecelo”, rescampla l’espertu. Un tema que trata nel so discursu d’ingresu a l’ALLA nel 1988, consciente, pol so llabor como profesor, de la importancia de l’alfabetización.

Orientador

Iglesias Cueva tamién afondó na so cualidá pa “orientar, siempre cola intelixencia, siempre cola sensibilidá, al creador y sobre too al llector. Esa selección, esa escoyeta qu’él fai siempre, tan perfeuta, d’unos autores, d’unos poemes, d’unos versos”.

Punxo d’exemplu la de ‘Antoloxía poética del Resurdimientu’: “Con qué aciertu, con qué prudencia, con qué intelixencia, escueye los diez poetes. Son diez autores n’equilibriu n’edaes, xéneru –cuatro muyeres ente los diez–… Y cuando digo aciertu ye que d’entós p’acá pasaron unos cuantos años y siguen siendo los clásicos”.

Un llistáu nel que taben Asur, Sánchez Vicente, Pablo Ardisana, María Teresa González, Concha Quintana, Roberto González-Quevedo, Antón García, Piñán, Lourdes Álvarez y Xuan Bello. “Tamos falando d’autores qu’en dalgunos casos taben acabante d’asoleyar el so primer títulu y poco más”, destacó, pa depués emponderar el so llabor nesi mesmu sen al frente de la revista ‘Lliteratura’ y de la coleición ‘Tiempu de Cristal’.

Pa finar, recordó la so última ponencia importante, nes Xornaes Internacionales d’Estudiu de l’ALLA del 2013, ‘Algoritmu de los díes de la vida propia. Una mirada circunstancia sobre poesía nueva’. “Aparte de presentanos un llistáu de tolos autores nuevos –pon el finxu a partir de los nacíos nel 76– fai una escoyeta como siempre fai él, recomendando autores, y quiero creer que va tener l’aciertu que tuvo nel 89. Él escueye a dalgunos como Pablo Texón, Vanessa Gutiérrez o Héctor Pérez Iglesias, inclusive dellos llibros de dalgunos d’esos autores, dellos versos. Ye lo que más me presta ver de Bolado, cuando pon el focu sobre un versu concretu y fai plantear tola llectura otra vez del poema”, confesó.

Na semeya, Mori, Piñán y Iglesias Cueva.