Xosé Lluis Campal denuncia’l silenciu del asturianismu énte’l RIDEA

La polémica sigue alredor del congresu qu'entama'l Real Institutu d'Estudios Asturianos polos sos 60 años y nel que nun va aceptar que se llea una ponencia n'asturianu sobre la normalización llingüística nos conceyos. El filólogu Xosé Lluis Campal, miembru del RIDEA, retiró en señal de protesta la ponencia que tenía previsto llleer en congresu y denunció énte Asturies.com la inacción del asturianismu, que diz que nun ta denunciando'l casu como debiere.

Yolanda Magdalena, que fuere responsable a lo llargo de dellos años del Serviciu de Normalización del Conceyu de Llangréu presentare a esti congresu la ponencia "La dignificación de la llingua asturiana al traviés de los servicios de normalización llingüística nos Conceyos" na que resumía les últimes iniciatives normalizadores de la llingua asturiana n'alministración local. Anque les bases del congresu nun especificaben l'idioma en qu'habíen presentase les comunicaciones y ponencies, una comisión organizadora del congresu encabezada pola filóloga Josefina Martínez mandó que la ponencia se lleere en castellanu. Una carta unviada pol director de política llingüística Ramón d'Andrés nun foi a torcer el brazu de la institución, que-y negó a la ponente'l derechu a emplegar l'asturianu en congresu.

En señal de protesta y cuando falten yá poques selmanes pal entamu del congresu, previstu pal 10 de mayu, el tamién filólogu y miembru del RIDEA Xosé Lluis Campal decidió retirar la ponencia que tenía presentada pa lleer nel seminariu. Les razones qu'aporta l'estudiosu de la lliteratura asturiana pa esta renuncia son munches, denunciando Campal el fechu de qu'una institución que ye dependiente de la Conseyería de cultura y que polo tanto tendría de mandase poles lleis que reconocen el derechu a espresase n'asturianu como la Llei d'Usu, actue d'una manera que "supón conculcar el derechu a la llibertá d'espresión xenerando una situación kafkiana", pero Campal ye enforma críticu cola actitú que nesti casu ta demostrando'l movimientu asturianista nel so conxuntu y coles instituciones que tendríen de tar más comprometíes cola defensa del asturianu.

Ello ye que, al paecer de Campal, lo que ta faciendo'l RIDEA ye "conculcar la lliberta d'espresión" y "sentar precedente" pa futures situaciones, ello col agravante de que s'atecha pa esta decisión "n'argumentos que dan risión" y desobedeciendo lleis poles que tien de mandase "en cuantes que ye una institución y non una empresa privada" , polo que ve xustificao que nesti asuntu l'asturianismu s'asitie "trés de la pancarta" y faiga toles movilizaciones precises pa que se-y reconoza'l derechu a Yolanda Magdalena a presentar la so ponencia nel idioma en que la escribió. Campal alvierte de que la polémica por esti asuntu "lleva ehí yá cerca de dos meses ensin que se vieren posicionamientos claros sacantes el de la Oficina de Política Llingüística" cuando tendría d'haber "tou un movimientu" falando d'ello. L'estudiosu diz que nun se trata d'una cuestión menor y llamenta que "si l'asturianismu nun ye a reivindicar una cuestión moral y de derechos como esta, ta consintiendo que se tome d'escayos el camín a la oficialidá".

El fechu de que la ponente nun sía una persona con fama nin conocida popularmente lleva a Campal a duldar "si se consentiría que pasare lo mesmo con un autor de más proyección" y a camentar que lo que se ta faciendo con Yolanda Magdalena dende asociaciones, instituciones y partíos políticos ye un casu de "ostracismu" que nun s'entiende "en cuantes qu'esto pue pasá-y a cualquier persona". L'ostracismu que denuncia campal taría tamién dientro del RIDEA, una institución de la que Campal recuerda que "toos sabemos del so pasáu franquista, pero que dende la llegada de la democracia ye tamién una institución democrática y a la qu'amás pertenez xente con sensibilidá asturianista que se que-yos duel esta situación, pero que nun entiendo por qué tan callando nesti asuntu" anque cola escepción del profesor Javier Fernández-Conde, que tamién denunció'l casu. Tampoco llibra de la crítica'l Conceyu de Llangréu, d'au ye la ponente y dende'l que s'afaló a Yolanda Magdalena a presentar la ponencia pero que nun denunció'l casu.

D'otra manera, la presidenta de l'Academia de la Llingua Ana Cano, en declaraciones al diariu "La Voz de Asturias" afirmó que l'actitú del Ridea nesti casu abultába-y "impresentable y esperpéntica" y responsabilizó a la Conseyería de Cultura, como organismu del que depende'l RIDEA, de les decisiones que tuvieren de derivase d'ello.