Xosé Antón González Riaño: “La UABRA ta siendo un ésitu total”

Tres pasar l’ecuador de la Universidá Asturiana de Branu (UABRA), el so direutor, Xosé Antón González Riaño nun pue facer otra cosa que mostrar la so satisfaición. “La UABRA ta siendo un ésitu total”, afirmó.
 
“Ta desarrollándose too perbien y la xente ta participando muncho en toles actividaes que se celebren a diariu”, señaló González Riaño, que destacó l’apoyu que ta mostrando’l Conceyu de Cangas del Narcea y los sos ciudadanos a la UABRA. “En tolos eventos y conferencies qu’entamamos vien la conceyala de Cultura o l’alcalde, y eso ye mui importante pa nós”, destacó. D’igual forma, apuntó l’aciertu na programación de toles actividaes de la Universidá de Branu, como la mesa redonda sobre la TPA, l’alderique sobre’l movimientu 15-M o la conferencia d’ayeri de Francisco José Llera Ramo, que González Riaño calificó de “interesantísimes”.
 
Pa esta nueche ta prevista la proyeición, a les 22.30 hores nel Teatru Toreno, de ‘El Tercer Home’. Esta película ta doblada al asturianu por Gonzali Producciones y trátase d’un clásicu del cine. Otra manera, ayeri, los asistentes a la UABRA pudieron disfrutar d’una preba de vinu de Cangas, en concreto de Ḷḷumes, de Bodegues Oblanca, de la collecha del 2010.