Xornaes sobre tradición oral en Xixón

La Escuela de Música Tradicional La Quintana, col sofitu de la Fundación Municipal de Cultura, Educación y Universidá Popular, del Ayuntamientu de Xixón y la Oficina Municipal de la Llingua, organiza los próximos díes 21 y 22 d'abril, del 2006 una nueva edición de los "Alcuentros cola Tradición Oral". L'oxetivu d'esta actividá ye'l d'afalar a usu y conocimientu de la tradición oral como puntu referencia del folclor, al mesmu tiempu qu'amosar la importancia de mantener viva la tresmisión y los diferentes medios que pueden usase pa ello.

Pelos Alcuentros van pasar diferentes persones que d'una manera o otra van aportar el so conocimientu de la historia oral dientro d'unes actividaes programaes que van entamar el vienres 21 d'abril a les 19:30h nel Salón d'Actos del Atenéu de La Calzada con una conferencia de Jesús López Suárez, investigador y responsable del Archivu de la Tradición Oral del Muséu del Pueblu d'Asturies en Xixón. Darréu, Manolo Santiago López, col grupu de teatru de solombres "El Turnebís del Tribilín" va representar los romances entitulaos "L'enamoráu y la muerte", "El mozo arriero" y Albaniña" mientres que la xornada inaugural va echar el piesllu cola participación d'un grupu de neños del grupu de folclor Blimea, que van escenificar el romance entituláu "Rico Franco". Pal día dempués, sábadu 22, les xornaes treslládense al Salón d'Actos del Centru Cultural Antiguu Institutu con un conciertu de romances trradicionales nel que van participar cola zanfona y la bandurria Fonsu Fernández, director del Muséu de la Gaita, de Xixón y Dani García de la Cuesta, de la Escuela de Música Tradicional "La Quintana" conduciendo a los alumnos de la mesma escuela "La Quintana".

Amás de contar cola presencia de persones rellacionaes coles tradiciones que s'atopen n'Asturies, nos Alcuentros participen tamién persones d'otros llugares. Ente ellos va tar el músicu cántabru Chema Puente, que va interpretar cantares y romances de la so tierra y que va echar la pesllera a estos Alcuentros.