Les Xornaes sobre la Querella Arxentina contra los Crímenes del Franquismu acueyen la estrena del documental ‘Paisaxe’ de Bande

Baxo’l títulu de ‘Fugaos, trabayu esclavu y neños robaos’, La Comuna d’Asturies entama esta fin de selmana n’Uviéu les Xornaes sobre la Querella Arxentina contra los Crímenes del Franquismu. Ábrense esti vienres cola estrena del documental de Ramon Lluís Bande ‘Paisaxe’, complementu al gallardonáu ‘Equí y n’otru tiempu’.

Esta entidá asturiana forma parte de la Coordinadora Estatal d'Apoyu a la Querella Arxentina (CeAQUA), investigación abierta nel 2010 pola xueza María Servini tres una denuncia de familiares de víctimes sobres los crímenes del franquismu que quedaron impunes dafechu pola Llei d’Amnistía del 1977. Dende esi momentu, foron llegando denuncies nueves que sumar a la querella, en concreto 38 dende Asturies puestes nel consuláu arxentín por 21 persones. Cola fin de dar a conocer lo que significa la querella y impedir que caiga nel escaezu la memoria de les persones asesinaes, la Comuna d’Asturies entama estes xornaes que van tener como sede, güei y mañana, la uviedina Biblioteca d’Asturies ‘Ramón Pérez de Ayala’, asitiada n’El Fontán.

L’actividá va principiar esta tarde, a les 18 hores, con una presentación a la que va siguir la estrena del documental ‘Paisaxe’. Nél Bande recueye los testimonios de les persones que guiaron al realizador a llugares nos qu’hai constancia de que foron asesinaos dalgunos guerrilleros asturianos que s’echaron al monte ente ochobre del 1937 y payares del 1952 col oxetivu de salvar la vida y continuar cola resistencia al franquismu, espacios que protagonizaron ‘Equí y n’otru tiempu’, cinta gallardonada col premiu de la crítica internacional FIPRESCI a la meyor película de la seición ‘Resistencias’ del Festival de Cine Europeo de Sevilla del 2014. D’esta forma, el xixonés, que va protagonizar un alderique, zarra un proyeutu que busca caltener viva la memoria d’estes persones que llucharon pola llibertá.

Segunda xornada

Un tema central de la querella, como ye “el trabayu esclavu al que se sometieron miles y miles de presos republicanos y qu’engordó les cuentes de munches empreses qu’agora coticen nel IBEX 35”, va abrir la segunda xornada. Asina, a les 10.30 hores, Cecilio Gordillo, del grupu de trabayu ‘Recuperando la Memoria de la Historia Social de Andalucía’ de CGT Andalucía, va impartir la conferencia ‘Esclavos del franquismu: un negociu mui rentable’. Darréu, a les 12.30 hores, el protagonismu va pasar pa otra exa fundamental dientro la querella, como ye’l robu sistemáticu de neños y neñes a lo llargo de la dictadura. La encargada d’afondar nello ye Sole Luque, presidenta de l'asociación Todos los Niños Robados Son También Mis Niños” y representante de CeAQUA, cola charra ‘El robu de neños nel Estáu español: movilización social de les víctimes en busca de Xusticia’.

Yá de tarde, a les 17 hores, Jacinto Lara, abogáu de la querella arxentina y presidente de l'Asociación Pro derechos Humanos en España, va falar de la ‘Situación actual de la Querella Arxentina. Informes de Naciones Uníes’. Al respeuto, dende La Comuna d’Asturies recuerden que “nestos momentos hai alredor de 300 querelles abiertes, más de 100 denuncies presentaes al traviés de los consulaos arxentinos de tol mundu y 19 imputaciones –ente ellos a dalgunos ex-altos cargos del franquismu–, coles correspondientes órdenes de detención internacional col fin d’estraditalos”. D’igual forma, apunten que “el Grupu de Trabayu de Naciones Uníes sobre desapaiciones forzaes denunció la pasividá del Estáu español na busca de los miles de desapaecíos y que la Llei d’Amnistía siga vixente”.

Pa finar les xornaes, va facese a les 19 hores un actu de reconocimientu a les persones querellantes, que van tar presentes “pa recordar los casos de represión y muertes que se llevaron a la xusticia arxentina al nega-yos esa posibilidá l’Estáu español".