Xornaes culturales en Llaranes

Dende güei vienres y a lo llargo d'esti fin de selmana van celebrase en Llaranes (Avilés) les xornaes nes sobre cultura asturiana "Xoranes 07". El centru cultural de La Toba de Llaranes va acoyer esta iniciativa organizada pola Asociación de Vecinos El Camín de Llaranes y El Pozón y pol colectivu xuvenil Llarizón.

Les xornaes, qu'incluyen una esposición de discos y llibros asturianos, van entamar la tarde del vienres a les 17;30h cola charra "Mitos y prexuicios na historia d'Asturies" que va tar a cargu de Rafael Rodríguez Valdés, historiador y coordinador de la revista d'historia d'Asturies "Erada", de la que va facese tamién una presentación. Pal sábadu 15, tamién dende les 5 y media de la tarde, queda una segunda conferencia de la escritora Ana Vanessa Gutiérrez, que va falar sobre lliteratura asturiana d'anguaño, y otra a cargu de Xicu Mata, centrada na arquitectura popular asturiana. La xornada va completase col homenaxe del colectivu Llarizón al escritor Bernardino Guardado y con una mesa redonda na que va tratase la situación del patrimoniu cultural y mediuambiental d'Avilés.