Xixón súmase a L’Angliru como final d’etapa de La Vuelta 2017

La Vuelta 2017 va decidise n’Asturies. El yá esperáu retornu de L’Angliru a la ronda ciclista va tener llugar na penúltima etapa, mentes que’l dia anterior el pelotón va aportar a Xixón. Un añu más la organización incumple la llegalidá col usu de topónimos castellanos yá derogaos baxo'l preste del Gobiernu y conceyos.

Esta situación nun se da n’otros territorios billingües polos que va pasar La Vuelta, como la Comunitat Valenciana y Catalunya, mentes que’l breve pasu per Navarra va ser per zona de fala castellana. Tampoco nun se respeten los nomes de llugar occitanos –esti añu la ronda arranca en Nimes– pero, a diferencia de los asturianos éstos nun son oficiales nel Estáu francés.

Asina, la primer etapa asturiana (la númberu 19 de la ronda, el vienres 8 de setiembre) del percorríu oficial dao a conocer por Unipublic baxo’l preste del Gobiernu d’Asturies y los conceyos de Xixón y Riosa –con representantes públicos na presentación oficial– va salir del Parque Natural de Redes y pasar pela ‘Falla de los Lobos’ o ‘Pola de Siero’, y finar en ‘Gijón’, topónimos que tán mal escritos inclusive en castellanu, yá nun esisten o tienen denominación billingüe. La forma correuta y oficial ye ‘La Faya los Llobos’, ‘La Pola Siero’ y ‘Gijón/Xixón’.

La siguiente, con repercusión mundial pola so llegada al míticu ‘Alto de l’Angliru’, va tener llugar el sábadu con salida de Corvera. El pelotón va tomar direición a ‘Grado’ –oficialmente ‘Grau/Grado’– y Bárzana enantes d’afrontar dos puertos de primer categoría como la Cobertoria y el Cordal que castigarán les piernes de los ciclistes de cara a la xuba del altu riosanu.