Xixón Sí Puede felicítase de la presencia del asturianu nes actividaes braniegues

|
Xixón Sí Puede felicítase de la presencia del asturianu nes actividaes braniegues

El cumplimientu del Plan de Normalización ye motivu d’aplausu pa Xixón Sí Puede. El so voceru, Mario Suárez del Fueyo, fai referencia a la presencia del asturianu nes actividaes braniegues: “Ésta ye la llinia na qu’hai que trabayar en Xixón”.

En concreto, la candidatura de xunidá popular fai referencia al cumplimientu del artículu 1.3 ‘Documentación Municipal y publicidá institucional’, nel so apartáu 17, que cita “afitar criterios d'usu esclusivu o preferente del asturianu nos procedimientos de comunicación y d'imaxe corporativa municipal”. Asina, tres una quexa de Xixón Sí Puede en xunu na Comisión de Bienestar Social y Cultural tres decatase de que’l programa del branu apaecía namái en castellanu, el criteriu cambió y pudo vese una presencia del asturianu mayor esti añu.

Un exemplu mui gráficu foi l’usu del logu de la ciudá na so versión asturiana xunto cola palabra ‘Branu’ enriba de los escenarios instalaos na Plaza Mayor y na sablera de Pando mientres les actividaes festives de xunetu y de lo que va d’agostu. “Ésti ye’l camín de normalizar la llingua asturiana. Facer lo que se fai na cai nes instituciones. Combinar l’asturianu col castellanu ye la normalización de la que nosotros falamos”, apunta Suárez del Fueyo, que considera que “l'usu de la llingua asturiana tien d'espardese al restu d'árees de la política y la vida municipal”.

Na semeya, conciertu de Felpeyu nel Festival Arcu Atlánticu col logu de Xixón n'asturianu na parte superior del escenariu.

Contador Estadistiques